Napoli leh Roma inhnehtawk

Serie A champion nih tum Napoli leh Champions League khelh phak tum AS Roma te chu 1-1 in an inhnehtawk. Inkhelh banah Lorenzo Insigne chuan mittui nen khelmual a chhuahsan, hei hian league match pawimawh a nihzia a lantir.

Thawhṭanni zan inkhel dangah Atalanta chu Verona lakah 2-1 in an chak lo a, pariatnaah awm chhunzawmin season thara UCL khelh beiseina a thamral tluk a ni - a zawna kum hnih European football inelna sang ber an khelh chu a tawp dawn.

Inhnehtawk
Tun season tawp rualin Insigne-a'n Napoli a chhuahsan dawn. Legend Diego Maradona hoa an champion hnuah kumin hian Serie A nomawi an beisei leh a, beiseina pawh a sang hman viau.

Minute 11-naah Hirving Lozano-a penalty hlawhchhuah chu Insigne-a'n goal hmahruai khung nan a hmang, keeper Rui Patricio-a'n zuan dik mah se ball kalna a sir em avangin a dang phak lo.

Napoli hian khung belh theihna remchang an nei, mahse Victor Osimhen-a khung tur chu Chris Smalling chuan a lo dansak a, ball per hi Lozano chuan pet leh mah se keeper Patricio a paltlang zo bik lo a ni.

Roma pawhin Gianluca Mancini hmangin bar an tihper, minute 78-naah boruak a sang a, mual sira awm keeper Gianluca Mancini chu red card pek a ngai hial, inkhelah erawh nghawng a nei hran lem lo.

Hun tawp dawnah Roma hian an bei let a, box chhunga vengtu nei loa awm Stephan El Shaarawy chuan chiang zetin a khung a, mualneitu Napoli lam tan goal dang khung belhna hun a awm tawh lo, point mamawh team pahnihin point khat ve ve in an insem.

Mittui nen
Napoli hian Serie A nomawi an chawi lohna a rei tawh a, an ropui lai sawi dawn chuan Maradona hoa an champion hunlai sawi a ngai. Argentina captain hlui hi a thi tawh a, an stadium pawh a hminga dahin an jersey hmaah a lem an tarlang hial.

Maradona awm tawh lo mah se beisei aia ṭhain season an hmang, champion lai Inter Milan leh AC Milan te an elphak ve hial. Mahse, tunah chuan khelh zat inangah hmahruaitu Milan chu point liin an phak lo, khelh hmabak panga la awmah thil erawh a la danglam thei.

Insigne-a'n Napoli tan nomawi chawi a chak takzet a, captain armband hreng chung ngeia Serie A title lak chu thil châkawm pawh a ni. Amaherawhchu an hmabak a hautak tawh dawn a, lungngai taka khelmual a chhuahsan pawh hi thil mak a ni lo.

Napoli manager Luciano Spalletti chuan, "Hun rei tak chhung inkhel kan thunun a, goal kan nei hmasa bawk. Goal dang khung belh theihna remchang kan ti hlawhtling thei lo kha a pawi a, a tawpa goal kan chhuah kha a pawi lehzual," a ti.

Penalty pek loh
Inkhel result-ah Jose Mourinho a lawm tawh lo. AS Roma manager hian a player Nicolo Zaniolo chuan penalty hlawh chhuak ngei turah a ngai. Mahse, penalty an pek loh avangin match referee chungah a lawm loh thu a sawi chhuak.

Roma manager Mourinho chuan, "Point khat kan hmuh avang khan ka lawm a, lawm takin khelmual ka chhuahsan. Amaherawhchu palina ni phak tur chuan kan result hi lawm viauna tur a ni hran lo, inkhelh harsatna hmun aṭanga point hmuh erawh inhnemna tur a ni ang.

"Penalty kan hmu ngei turah ka ngai. VAR hmang pawhin chiang takin a lang, chutiang chunga pek kan la ni lo cheu kha chu thil mak a ni. Referee te hian inzir ṭhat ngaihna lai an nei ve bawk," tiin a sawi a, a naute chu huaisen a tih thu a sawi bawk.

Roma hian Ningani zanah Europa Conference League an khel chau, match hautak an khelh hnu lawka team ṭha hmachhawn leh hi thil awlsam a ni lo. Chuvangin Napoli khelmual aṭanga point khat hmuh hi a chhe hran lo.

Palina ni phak tur erawh chuan Roma tan a harsa tawh dawn. Match 33 aṭangin point 58 an hmu a, palina Juventus an phak lohna chu point nga a ni. Tun kar tawpah champion lai Inter Milan an lenchilh dawn, inkhel hmuhnawm leh boruak sang a ni ang.