Rajasthan chakna Chahal leh Buttler

Indian Premier League-ah Thawhṭanni zan khan Rajasthan Royals (217/5)-in Kolkata Knight Riders (210) run sarihin an hneh. Brabourne Stadium-a inkhel hmuhnawm bikah hian Rajasthan batter Jos Buttler chuan 103 runs a siam a, Rajasthan bowler Yuzvendra Chahal chuan wicket nga (40/5) lain hattrick a siam bawk.

KKR-in vawm hmasak an thlang a, Rajasthan tan Buttler a che ṭha tluang zel. English batter Buttler hian tun season-ah century vawi hnih a siam a; Virat Kohli, Shikhar Dhawan, Hashim Amla, Shane Watson leh Chris Gayle te nen season khata century vawi khat aia tam siam thei zingah a tel.

Buttler hian ni 16 chhungin century vawi hnih a siam bakah half century vawi hnih a siam a, Rajasthan-in match ruk an khelh tawha vawi li hnehna an chan theih nan a pawimawh hle.

Over 20-ah Rajasthan hian 217/5 runs siam mah se Knight Riders batter Aaron Finch (58), captain Shreyas Iyer (85) te an chet ṭhat avangin over tawp ber thlengin boruak a hot. Rajasthan tan Chahal-a'n wicket nga a lak bakah Umesh Yadav-a'n over tawp berah run thum chauh pein wicket hnih a la. KKR hian over tawp berah 11 runs siam se chak thei an ni a, 19.4 overs-ah an thih kim avangin an chak ta lo.

Zanin dar 7:30 hian Delhi Capitals leh Pubjab Kings te Maharashtra Cricket Association Stadium-ah an inkhel leh ang. Delhi hi vawi nga an khelh tawh aṭanga vawi hnih chauh an la chak avangin insiamṭhat an mamawh hle.