RB Leipzig khingpui tur Union Berlin

Zanin dar 12:15 hian DFB Pokal semifinal-ah RB Leipzig-in an mual Red Bull Arena Leipzig-ah Union Berlin an mikhual dawn. German Cup-ah hian champion ngun ber Bayern Munich leh champion lai Borussia Dortmund an tlak tawh avangin season liam ta finalist RB Leipzig hi champion turin an dinhmun a ṭha hle.

Leipzig hian Bundesliga-ah Bayern leh Dortmund elpha lo mah se match 30 an khelh aṭangin point 54 an hmu a, pathumnaah an awm mek. Domenico Tedesco hote hi season thara Champions League khel turin an dinhmun a ṭha a, chuvangin German Cup-ah hian an insawrbing thei ang.

Season ṭantirh khan Leipzig hi Jesse Marsch hnuaiah an khel a, Marsch hian Bayern Munich pantu Julian Nagelsmann a thlak. Amaehrawhchu Marsch hnuaiah Leipzig hi an chet ṭhat loh avangin December thlatir khan Spartak Moscow aṭangin Domenico Tedesco an lalut.

Kum 36 mi Tedesco hnuaiah Leipzig an che ṭha. Tedesco hian Bundesliga-a 11-na (pld 14, 18pts) kha pathumna (pld 30, 54 pts) ah a vawrh chho a, DFB Pokal leh Europa League-ah semifinal an luh avangin nomawi pahnih chawi thei dinhmunah an ding mek bawk.

Leipzig khingpui tur Union Berlin hi Bundesliga-ah paruknaah an awm mek a, season ṭha tak an hmang. Union Berlin chhuanvawr Taiwo Micheal Awoniyi hi Liverpool tana khel pha lo ni mah se Nigerian striker hian tun season-ah goal 17 a khung tawh a, Leipzig tlarhnung tan ven uluk a ṭul ang.