Lampard-a Everton an him dawn em?

January 31 khan Everton-in Frank Lampard an lalut a, hetihlaia an beisei chu top 10 huang chhung tala awm theih a ni a, mahse, English coach hnuaia match sawm an khelh tlin meuh chuan relegation zone tlanchhiatsan dan mawlh an ngaihtuah tawh!

Lampard-a'n Everton-ah beisei angin hna a thawk lo a, league match sawmah vawi sarih zet a tlawmpui a, match thum chiah a chakpui - relegation zone aṭanga an himna chu point thum chauh a ni a, zanin dar 12:15-ah team ṭha Leicester City an mikhual dawn.

Super Frankie-a'n Everton hi season tharah Premier League khelhpui a duh chuan tlawm a thiang tawh lo a, chak ngei ngei a mamawh - Foxes zawhah hian Liverpool leh Chelsea a zawnin an hmachhawn dawn a, a awlsam lo ang.

Ngam loh val
Lampard-a'n a team chakpui a mamawh lai taka a hmachhawn tur hi a ngam ngaih loh Leicester City an ni - coach a nih hnua Foxes a hmachhawn vawi thumah a chak zo lo vek!

Chelsea legend hian vawi hnih draw result neiin, vawi khat a tlawm a, Liverpool nen Leicester hi vawi thum a hmachhawn tawha a la hneh theih loh an ni - he thawnthu hi zaninah her danglam a mamawh.

Mahse, Everton fan-te thla timuang turin an team hian an match hnuhnung berah Manchester United chu 1-0 in an barakhaih a, player man to rual awmkhawmna team an hneh theih avangin Foxes lakah an inringtawk sawt ang.

Team dinhmun
Lampard-a'n hliam vangin Andros Townsend, Tom Davies leh Nathan Patterson a chhawr thei lo chiang tih loh chu player a chhawr thei deuh vek dawn a, Foxes lakah chhuanlam tur a nei lo.

Chuti a nih chuan tlarhmaah Anthony Gordon, Richarlison leh Dominic Calvert-Lewin an inkawp leh thei ang a, Europa Conference League khel chau Foxes tan anni dan beh hi hna awlsam a ni lo ang.

Richarlison hi ven uluk bik tur a ni - Brazilian forward hian Leicester a hmachhawn hnuhnung parukah vawi li goal a khung a, Premier League club zingah Southampton leh Wolverhampton Wanderers (5 goals) lakah tih lohah chuan Foxes lakah a khung hnem ber.

Foxes an chau
Leicester-in season hmasaah Champions League khelh phak tumin league-ah hun an hmang a, FA Cup-ah an champion bawk - coach Brendan Rodgers-a'n a hnathawh avangin fak a hlawh a, a awm lo hran lo.

Season thar a inher rualin FA Community Shield-ah nomawi an chawi leh a, Foxes chungah mipui beiseina a sang. Mahse, Liverpool boss hlui Rodgers-a hoin Leicester an chuai ta emaw, tih mai tur a ni.

Foxes hi Premier League-ah pakuana an ni mek a, league match 30 an khelh aṭangin vawi 11 chiah an chak a, vawi sarih an draw a, vawi 12 an tlawm - Everton-in an hlau bik lo tawp ang.

Aw beiseina!
Foxes hian league lama an chet ṭhat loh thup mawi nan European football-ah beisei tur an la nei mek a, ECL semifinal an lut tawh - a thiam pali zinga tel tur hian Dutch club ṭha PSV Eindhoven an pet chhuak thei tih theihnghilh lo ila.

Mahse, PSV an hneh hnu an boruak ṭhat vanglai takin Foxes hian Newcastle United chu 2-1 in an ngam lo zui a, zaninah insiamṭhat nan Everton hman an tum ang.

Foxes tan James Maddison, Jonny Evans, Ricardo Pereira leh Kelechi Iheanacho te chu Magpies lakah bench-ah dah a ni a, Everton lakah erawh lo kir tawh tura beisei an ni - Lampard-a'n a naute a rem khawm thiam a ngai dawn.