Santosh Trophy Qualifier ; Vawiinah Mizoram Vs Tripura

Mizoramin kum 2014 khan Santosh Trophy final-ah Railways 3-0 in an hneh a, football hmanga India ram pum huap inelnaah a vawi khat nan an champion. Amaherawhchu Mizoramin nomawi an chawi hnuah Santosh Trophy final an lut leh tawh lo a, kum thum hnuah nomawi chawi leh ngei tumin vawiin tlai dar 1:00 hian Polo Ground number 1, Shillong-ah Tripura an hmachhawn ang.

North East Zone qualifier-ah Mizoram hi Group B-ah Tripura leh Manipur nen an awm ho a, group khat aṭanga pakhat chiahin final round an luh dawn avangin 2014 champion Mizoram hmabak a awlsam lo.

Mizoram team chu
Mizoram Premier League awm hnuah Mizoram football-in hma a sawn a, I League club Aizawl FC-in player an thawh loh bakah Mizo player ṭha an hui khawm. Hei chauh hi a ni lo, state pawn club aṭanga MPL player-te'n sawmna an hmuh avangin Mizoram team atana thlan tur an tlem sawt bawk.

Mizoram team coach Lal­sangzuala Hmar hian a vawi khat nan Santosh Trophy-ah Mizoram team a hruai dawn a, team manager Lalthanzama Vanchhawng hi Mizoram senior team manager ni thei naupang ber a ni bawk. Amaherawhchu Sanga hi AFC B licence holder a ni a, MPL hnuhnung bera Chanmari FC champion puitu a ni. Chhinga Veng tlangval Zama hi MFA registration vice chairman nilai a ni a, MPL hlawhtlinna kawnga mi ṭangkai niin tualchhung football hrechiangtu a ni.

Chanmari FC captain Lalrinchhana Tochhawng-in Mizoram tan captain hna a chelh chhunzawm dawn a, Mamit tlangval hi Santosh Trophy-ah vawi nga inlan tawhin tawnhriat ngah ber a ni. Vice captain atan Lalbiakhlua ruat a ni a, Mizoram Police winger hi vawi li a inlan tawh thung. Player 20 zingah Chanmari defender Ramfangzauva, Police midfielder Lalramtharmawia leh Royal Wahingdoh keeper H. Lalremruata te vawi khat ṭheuh an inlan bawk a, player 15 dang erawh Santosh Trophy-a la inlan lo vek an ni.

Beiseina a awm

Mizoram team hian De­cember 31 khan RG Stadium-ah I League club Aizawl FC nen practice match hnuhnung ber an khel a, goal awm loin an inhnehtawk. Friendly match a ni nachungin inkhel a nung ṭha a, Mizoram team lamah midfielder Zosangliana leh Labiakhlua te inhliam vangin an khel tluan thei lo a, Aizawl FC lamah right back Lallawmzuala a inhliam ve bawk.

Mizoram coach Lalsang­zuala Hmar chuan, "Inpuahchahna hun kan nei tam tawk lo a, kar khat dang chu hun la nei ila kan zia khawp ang. Chutihrualin kan khelh dan thlirin kan chungnung hret a, ka naute theihna enin Santosh Trophy-ah pawh beisei tur a awmin ka hria. Mizoram tan theihtawp chhuahin kan khel ang," tiin Vanglaini palai a hrilh.

January 2 khan Mizoram-in Aizawl an chhuahsan a, nimin tlai khan Shillong-ah training hnuhnung an nei. Mizoram manager Zama chuan, "Santosh Trophy la hmachhawn lo tam mah ila kan naute kan ringtawk hle. He inelna la hmachhawn lo, player 15 te hi keini ang bawkin an phur a, an discipline a ṭha bawk. Player panga tawnhriat nei kan kawl tel hi kan lawm a, duhthusam squad nei thei lo mah ila kan team hi kan inchawh pawlh ṭha hle," tiin an player neiha a lungawi thu a sawi.

Mizoram hian January 8, Pathianni khian Manipur an hmachhawn dawn a, Group B match hnuhnung ber hi inkhel pawimawh bik a nih a rinawm. Fixture chungchang sawiin Zama chuan, "Tripura nena kan inkhel hi a pawimawh a, kan chak phawt a ṭul a ni. Kan fixture chungchangah sawisel tur kan hre lo a, kan duh ang thlap zawk a ni. Manipur nen kan intawn hmain inpuahchahna hun ṭha kan nei dawn a, hei hi final round luhna kawngah a pawimawh ngei kan ring," tiin Vanglaini palai a hrilh.

Santosh Trophy vawi 71-na atan hian AIFF chuan dan thar a siam a, squad 20 zingah hian Under 19 player (kum 1997-a piang kher) panga an awm ngei ngei a ngai a, heng zinga pathum hi khel­mual chhungah an awm reng a ṭul bawk.

North East Zone Qualifiers
Group A
Vawiin Inkhel Tur
Mizoram Vs Tripura
January 6, Zirtawpni
Tripura Vs Manipur
January 8, Pathianni
Manipur Vs Mizoram
Group B
January 5, Ningani
Meghalaya Vs Arunachal Pradesh
Nagaland Vs Assam
January 7, Inrinni
Assam Vs Meghalaya
Nagaland Vs Arunachal Pradesh
January 9, Thawhṭanni
Arunachal Pradesh Vs Assam
Meghalaya Vs Nagaland

Mizoram Squad chu
# Hming Club Veng/Khua
Goalkeepers
1 F. Lalmuanawma Chanmari FC Khawbung
2 H. Lalremruata Royal Wahingdoh ITI Veng
3 Liansangpuia Ramhlun North FC Dampui
Defenders
4 H.Lalhlimpuia Bethlehem VT FC Lunglei
5 K. Lalmalsawma Bethlehem VT FC Bethlehem Vengthlang
6 Lalhmunmawia Mizoram Police FC Hualngohmun
7 Lalrinchhana Tochhawng Chanmari FC Mamit
8 R.Laldinliana Chhinga Veng FC Armed Veng South
9 Ramfangzauva Chanmari FC Vanchengpui
10 V.Lalchhuanawma ONGC Ramhlun North
Midfielders
11 Israel Laldingngheta Ramhlun North FC Salem Veng
12 Jesse Laldinpuia Zo United FC Khatla
13 Lalbiakhlua Mizoram Police FC Keifang
14 Lalmuanzova Chanmari FC Kanhmun
15 Lalramtharmawia Mizoram Police FC Hualngohmun
16 Lalrinchhana Chanmari FC Electric Veng
17 Zosangliana Sailo Ramhlun N FC Armed Veng South
Forwards
18 Lalrammawia Chanmari FC Sawleng
19 Lalrammuanpuia Bethlehem VT FC Armed Veng South
20 Lalsangbera Mizoram Police FC Dawrpui
COACHING STAFF
Designation Hming Club Veng/Khua
Manager Lalthanzama Vanchhawng MFA Registration Vice Chairman Chhinga Veng
Coach Lalsangzuala Hmar Chanmari FC Melthum
Assistant Coach Anand Gurung Chanmari FC Tanhril
Physiotherapist Ramtharzuala Bethlehem VT FC Bethlehem VT