Manchester khaw club chak
Thawhlehni zanah Manchester City midfielder Fernandinho hnawhchhuah ni mah se Pep Guardiola nauten 2-1 in hnehna an chang tho a. Manchester United-in sawisel hlawh taka West Ham midfielder Sofiane Feghouli hnawhchhuah a nih hnuah Hammers 2-0 in an hneh ve bawk.
City-in point 42 hmuin pathumnaah an awm a, kumhlui thlah zana an hneh loh Liverpool point hnih chiahin an pha lo. League match paruka chak zawn tawh United paruknaah an awm a, Jose Mourinho hoten champion an la beisei ve zel bawk.
Chhandamtu Aguero
Pep Guardiola-a'n Argentine forward Sergio Aguero chhawr thei tawh mah se bench-a dah a thlang. City tan Burnley hneh hi hna harsa niin a lang lo a, amaherawhchu minute 32-na lekah Brazilian midfielder Fernandinho chu Johan Gudmundsson tlawh avangin hnawhchhuah a ni.
Spanish manager Pep-a'n player 10 nichunga point thum hlawh chhuak turin Aguero leh David Silva te a luhtir a, hnehna an chang zui bawk. Minute 58-naah Gael Clichy-a'n City hmahruaina goal a khung a, Aguero-a'n minute li hnuah angle awm tawh mang lo aṭangin goal pawimawh a khung leh bawk.
City tlarhnung erawh ṭum dang ang thoin a phui lo a, minute 70-naa Ben Mee goal vangin Burnley an phur phah hle. Amaherawhchu mualneitu City an ṭang tluan a, Andre Gray-a'n chance ṭha tak a hlah bawk avangin Pep-a hoten point thum an hlawh chhuak hram.
Fernandinho-a'n tun season league-ah red card vawi hnih a hmuhna a nih avangin Brazilian midfielder hi match li khel thei lo tura hrem a ni ang.
Pep Guardiola-a'n hnehna chang mah se BBC Sport tana thawk Damian Johnson a chhan danah lungawi lohna a nei tih a chiang a, Spanish manager hian a lawm tih a sawi lang nachungin amah kawmtu awmze nei loin a chhang.
United an vannei
West Ham midfielder Feghouli-a'n minute 15-na lekah Phil Jones a tlawh a, United defender hi a tluk uar bawk avangin referee Mike Dean-a'n a hnawt chhuak.
United keeper David de Gea-a'n Hammers midfielder Manuel Lanzini goal khung tur ṭum hnih a dang a, West Ham forward Michail Antonio-a'n keeper chiah a hmachhawn hnuah a khung thei lo bawk.
Manchester United chak nan Jose Mourinho a pawimawh a, Portuguese manager hian substitute awmze nei siamin Marcus Rashford chuan amah ang bawka bench aṭanga lut Juan Mata goal khung tur a siam sak. Minute 78-naah Zlatan Ibrahimovic-a'n United goal hnihna a khung a, offside ni mah se pawm a ni tho.
United manager Mourinho chuan, "Referee thutlukna vangin West Ham ka khawngaih lo. Thutlukna sual vanga vanduai kan sawi dawn chuan keini hi heti lama champion kan ni," tiin Hammers-in an tawn ṭhin an tawng ve maia a ngaih thu a sawi.