Chelsea - record siam zan?
Premier League hmahruaitu Chelsea chuan zanin dar 1:30 hian nomawi chawi an tumna kawnga hnawksak tling phak Tottenham Hotspur chu White Hart Lane-ah an lenchilh dawn. Antonio Conte naute hian hnehna an chang a nih chuan Arsenal record khumin English football inelna sang bera season khat chhunga chak zawn rei ber an ni ang.
Italian manager Conte kaihhruaina hnuaiah Chelsea hian a zawnin league match 13 chhung hnehna an chang ta a, kum 2001-02 a Arsenal record an nih rual chiah. Gunners leh Chelsea chiah hi season khat chhunga Premier League match 13 chhung hnehna chang zawn thei an la ni - Blues hian Spurs lakah hnehna an chang a nih chuan record thar an siam dawn.
Blues hian kum hlui thlah zan khan an mikhual Stoke City 4-2 in an hneh a, league match khelh tawh vawi 19 aṭanga point 49 hmuin table chung berah an inbengbel chho zel a, anmahni aia match khata khel tam zawk Liverpool aia an san zawkna chu point nga a ni.
Chelsea tan Costa
Spanish international Diego Costa-a'n tun season-ah league goal 14 a khung tawh a, an match hnuhnung bera Stoke an hneh ṭumin goal khat a khung bakah Willian-a'n goal hnih a khung theih nan a thawh hlawk hle. Feet ruk leh inch khata sang striker palian hi Premier League season kal mek a hmatawng hlauhawm bera ngaih a ni hial a, goal ven thiam Spurs defender-te nena an innawk tur hi a hmuhnawm ang.
Chelsea tan hian season tir lama hliam vanga inlan tam lo midfielder Cesc Fabregas a par vul leh tawh. Arsenal captain hlui hian an match hnuhnung bera Willian goal khung tur chu siamsakin Premier League match 293 a khelh aṭangin assists vawi 100 a nei tling ta. Spanish midfielder Fabregas aia ṭhiante goal khung tur siam sak tam chu - Ryan Giggs (162), Frank Lampard (102) leh Wayne Rooney (101) te chiah an ni tawh.
Nikum November thla khan Chelsea hian Stamford Bridge-ah Spurs hi an lo mikhual tawh a, Christian Eriksen-a goal khung chu Pedro leh Victor Moses te goal hmanga chhang letin 2-1 in hnehna an chang. Conte chuan tun ṭuma an inkhel leh tur hi an tan chuan fiahna hautak inṭanna tur a nih thu a sawi.
Italian manager Conte chuan, "Match 19 kan khelh aṭangin vawi 16 hnehna kan chang a, vawi hnih a chak lo zawkah ṭangin ṭum khat chu kan khingpuite nen kan inhnehtawk thung. Season chawhma lam kan hman dan hi a duhawm hle a, tunah chuan inelna hautak leh khirhkhan zawk hmachhawn tura kan inbuatsaih a ṭul ta. Tunah hian hlim viau mah ila a tawp kan la thlen miau loh avangin hmabak kan la ngah a, Spurs aṭang hian fiahna a inṭan dawn a ni," tiin a sawi.
Spurs an ṭha tawk
Mauricio Pochettino enkawl Tottenham hi season kal meka goal 14 chiah la chhuahin goal chhuah tlem ber dawt an ni mek a, an tluk loh awmchhun chu Chelsea (13) chiah an ni. Spurs hian an league match hnuhnung berah Watford 4-1 in an sawp a, striker Harry Kane leh midfielder Dele Alli ten goal hnih ve ve an khung.
Spurs manager Pochettino chuan, "Tunah hian season hmasaa Leicester City ang mai kha kan niin ka hria, kan inlungrualin kan thawhhona a ṭha a, inpumkhat takin kan khingpuite kan hmachhawnṭhin," tiin an team boruak a ṭhat thu leh team dang hmachhawn tura hlauhthawnna an neih loh thu a sawi chhuak.
North London club hian an match hnuhnung pasarihah vawi ruk hnehna an chang thei a, tun hnaia an match hnuhnung paliah phei chuan goal 13 zet khungin goal thum chiah an chhuah a, an tlarhma an hriam ṭhat bakah an tlarhnung a phui ṭha hle tih a chiang - White Hart Lane-a inkhel tur an nih bawk avangin Chelsea an lo chelh a nih pawhin a mak lo ang.