Liverpool chelhtu Defoe

Premier League champion tum Liverpool an tawlhthlu a, Manchester City hneh hlim Jurgen Klopp-a leh a naute chelh dingtu chu Jermain Defoe a ni. Thawhṭanni zan khan Stadium of Light-ah Reds an lenglut a, vawi hnih ngawt hma hruai mah se Sunderland-in Defoe-a penalty chhuihluh vawi hnih hmanga an sut avangin 2-2 in an ṭin.

Liverpool hian minute 19-na lek­ah Daniel Sturridge hmangin an hmahruaina goal an khung a, Dejan Lovren-a ball pet aṭanga tauh luttu striker hi October 17 hnua Reds tana inkhel bul a ṭan leh hmasak ber a ni. Black Cats-in minute ruk hnu lekah an si phurh an sut a, Ragnar Klavan-a'n Didier Ndong a tih tluk vanga Liverpool penalty chawi chu Defoe-a'n an si phurh sutna goal ni turin a khung.

Reds tan an phu ang ngeiin Sadio Mane-a'n minute 72-naah an goal hnihna khung mah se minute 84-naa Seb Larsson-a free kick petah ṭul lo taka a kut a phar chhuah avangin ball-in a kut a fuh a, penalty a chawi. Defoe bawk lo pen chhuakin English striker hian harsatna nei loin a pet lut.

Reds an buai?

Liverpool-in inkhelh chhung zawngin 71% ball an chang a, target-ah vawi 15 zet shot an nei bawk - an vanneih ni nise chakpui tham a ni. Reds tan captain Jordan Henderson inlan theih loh a hriat a, ke artui hliam vanga chawl mek English midfielder hian league match an khelh leh hmasak ber tura Manchester United an hmachhawn hunah pawh a hmel a la lan thei dawn lo.

Sadio Mane-a'n Africa Cup of Na­tions khel turin Liverpool a mangṭha a ṭul rih a, Southampton forward hlui hi Senegal thlen san dan a zirin Reds tana a inlan theih loh hunchhung tur chu a chiang chauh ang. Tun season a hliam vanga league match nga chauh inkhel bul la ṭan thei Sturridge chu hliam vanga lakchhuah a ni a, English striker hliam hi a serious loh thu Klopp chuan a sawi thung.

Klopp a lungawi lo

Sunderland-in an goal hnihna an khung hmain Defoe chu Lucas-an a ti tlu a, free kick an hlawh chhuak. He free kick aṭanga ball kal zelah Reds-in penalty an chawi a, Jurgen Klopp a lungawi lo. German coach chuan, "Free kick tur niin ka hre lo. Chutihrual chuan kha aia ṭha zawka khel turin theihna kan nei tih ka hria a, mah se ni hnih liam ta lawkah khan Manchester City kan hmachhawn avangin a harsa a ni," a ti.

Klopp hian Sunderland nen an inkhelh hma hian a naute chu chawlh hahdam an duh a nih chuan chawlh a pek theih thu a sawi a, mah se player tumahin chawlh an dil lo. Klopp chuan, "City hmachhawn zo hlim kan nih avangin chawlh an duh chuan sawi turin ka ti a, media hmaa an chawlh chhan ka zep tur thu ka sawi bawk. Mahse, tumahin min dil lo a ni," tiin a naute rilru puthmangah a lawm hle.

Borussia Dortmund boss hlui chuan an nomawi beiseina a la tawp loh thu sawi nghalin, "Vawi khat chetsual vanga talbuai tur kan ni lo a, kan hmabakah match khelh tur tam tak a la awm a ni," tiin a beiseina a la tawp lo.