Goal mak ropui khungtu Giroud

Olivier Giroud-a'n Crystal Palace lakah goal mak danglam leh ropui 'scorpion goal' a khung. Giroud-a goal hi Arsenal manager Arsene Wenger chuan kum 21 chhung Gunners a enkawl chhunga an goal khung ṭha bik panga zinga a tel thu a sawi.

France international striker Giroud hian Alexis Sanchez cross chu a tlan pel deuh tawhin lang mah se Palace defender pahnih karah a ke vei lamin a kheng kang a, ball hian bar perin an hmahruaina goal ni turin a lut.

Wenger chuan, "A tih dan kha thil theih loh nia lang ni mah se hun pawimawhah chuan tih theih a ni. Ball lo kal kha duhthusam leh tum lawk dan ni lo mah se Olivier khan thil danglam leh ṭha bik a ti a ni," tiin a sawi. Giroud hian a goal khung chu vanneihna sang ber vang a nih thu a sawi ve bawk.