Hunters lakah Warriors an hrang

Thawhṭanni zan khan Pre­mier Badminton League khelh chhunzawm a ni a, Awadhe Warriors chuan Hyderabad Hunters chu 5-0 in an sawp.

Gachibowli Indoor Stadium, Hyderabad-a inkhelah Warriors tan hian Kidambi Srikanth chuan Rajiv Ouseph lakah 13-11, 7-11, 11-13 in hnehna a chang a, a team a chakpui. Indian shuttler bakah hian Warriors tan world number 17 Wing Ki Vincent Wong chuan Sai Praneeth chu 11-13, 11-6, 13-11 in a hneh ve bawk.

Hunters tan Rio Olympic champion Carolina Marin chuan world number 1 hlui Saina Nehwal chu 15-14, 11-5 in hneh ve mah se trump match-ah Savitree Amritai leh Bodin Isara te chuan Hoi Wah Chau leh Satwiksairaj Rankireddy te chu 11-9, 12-10 a an hneh ve leh avangin Hunters beiseina a tawp.

Hyderabad Hunters hian an match hmasa zawkah Chennai Smashers 4-3 in an lo hneh tawh a, match hnih an khelh tawhah hian point li hmuin table-ah pathumna an ni. Hetihlai hian an match hmasa bera point nga hmu thei Warriors chu hmahruaitu an ni mek thung.

Zanin hian inkhel pakhat a awm leh dawn a, dar 7:00-ah Hunters hian Mumbai Roc­kets an hmachhawn leh ang. Mumbai tan tun ṭum hi an match khatna tur a ni ang.

PBL hi?

Premier Badminton League hi January 1 aṭang khan khelh ṭan niin January 14 khian khelh zawh a ni ang. PBL season thumnaah hian team paruk Mumbai Rockets, Awadhe Warriors, Hyderabad Hunters, Bengaluru Blasters leh Chennai Smashers te an inel a ni.

Inelna hi league round hmanga khelh hmasak niin team tinte hi match nga hmang zelin an inkhel kual vek dawn a, chumi hnuah a sang paliin semifinal an khel ang. Team tin hian an inkhelh apiangin vawi khat 'Trump Match' an nei thei a, hemi match bika hnehna an chan chuan point hnih hmuin an chak lo a nih chuan point khat paih sak an ni thung. Match dang zawngah erawh a chakin point khat an hmu a, chak lohin point paih a awm lo bawk.

Team pahnihin trump match atan match inang an thlang thei a, match hrang a nih ṭum chuan trump match thlang lo zawk point hmuh dan chu a ngaiin a kal thung ang.