Federer-a'n a dam tih a lantir

Roger Federer chun season bul ṭan nan a dam chiang tawh tih a lantir. Grand Slam vawi 17 champion tawh Federer hi Hopman Cup-ah Switzerland tan inlanin Dan Evans chu 6-3, 6-4 in a hneh a, Swiss hian Great Britain lakah 3-0 in hnehna an chang.

Kum 35-a upa Federer hi season hmasa khan hliam a neih fo avangin a inkhel tam lo a, kuminah season bulṭan theiin tunah hian tun season-a major tournament hmasa ber tur Australian Open khel turin a inbuatsaih mek.

Federer chuan, "Court-ah nuamti takin ka inkhel thei leh ta. Ka tan chuan hei baka nuam hi a awm thei chuang lo a, match hmasa berah hnehna ka chang a, a vawi hnihna leh vawi thumna pawh - chutiang zelin kumin chhungin a tam thei ang ber hnehna chan ka duh. Tuna pawimawh hmasa ber chu Switzerland tana ṭha taka khelh hi a ni," tiin a sawi.

Hopman Cup hi Perth, Australia-ah khelh mek a ni a, ram leh ram team hmanga inelna a ni. Kuminah hian Australia, Czech Republic, France, Germany, Great Britain, Spain, Swiss leh United States te an inlan. Ram pariatte hi group pahnihah ṭhen hran niin an inkhelh kual hnuah group hmahruaitu pahnihin final an khel dawn a ni.