BCCI hotupa turin Ganguly hming a ri ring
Supreme Court chuan court thupek an zawm loh avanga president Anurag Thakur leh secretary Ajay Shirke te Board of Control for Cricket in India (BBCI) a an nihna bansan tura thu a pek hnuah India captain hlui Sourav Ganguly chu BCCI hotupa thar ni turin a hming a ri ring hle.
Indian Super League club Atletico de Kolkata neitu zinga mi ni bawk Ganguly hi Cricket Association of Bengal-ah president a ni mek a, state association hnuaia hruaitute chu BCCI hruaitu tura rawt theih an nih avangin cricket khawvela hming langsar sa Ganguly hming hi lamrik a ni.
Tun dinhmunah India rama cricket thuneitu sang ber BCCI a senior ber chu Central Zone aiawha vice preisdent dinhmun chelhtu C.K. Khanna a ni a, BCCI hotupa ber ni tur hian Ganguly bakah TC Matthew (vice-president, West Zone) leh Gautam Roy (vice-president, East Zone) te chu hming langsar an ni.
Ganguly hian inkhelh a chawlhsan hnuah pawh administration lamah tawnhriat a nei leh nual tawh a, September 24, 2015 khan CAB president-ah ruat niin kum 2013 a IPL a thamna sum lengvel chungchang chhuichiang tura ruat zingah a lo tel tawh bawk.