Serena Williams a chak nghal

World number 2 Serena Williams chu thla li chhung dawn lai a inkhelh theih loh hnuah tennis court chhungah a inlan leh a, tun season-a a match hmasa berah world number 69 Pauline Parmentier chu 6-3, 6-4 a hnehin Auckland Classic second round a lut.

Nikum September thla khan Serena hi Karolina Pliskova hneh loin US Open semifinal aṭangin a tla a, hemi hnuah a dar (shoulder) na vangin a inkhel zui thei lo a, midang aiin a season a tawp hma bik. American star hi tunah chuan a hliam dam tawhin ṭha takin a inkhel leh thei tawh a ni.

Kum 35-a upa Serena chuan, "Thla tam tak hnuah ka inkhel leh chauh a ni a, ka beisei aiin ka khel ṭha. Ka khingpui kha player ṭha tak a nih bakah kan inkhelh chhung khan thli (wind) a thawt nasat avangin harsatna ka tawk. Minute 75 zet kan inkhelh hnua hnehna ka chang thei hi ka lawmin ka hlim takzet," tiin a sawi.

Grand Slam vawi 22 champion tawh Serena hian nikum khan Angelique Kerber lakah world number 1 nihna a hloh a, German nula hi Australian Open final-ah a hneh lo bawk. Janaury 16 aṭanga khelh ṭan tur Australian Open-ah hmeichhe player langsar pahnih hian an inlan tur thu an ti chiang tawh.

Serena hian hmeichhe Grand Slam nomawi chawi hnem ber Steffi Graf (22 titles) a nih rual tawh a, kuminah hian major title pakhat chauh pawh a lak belh thei a nih chuan record thar a siam dawn a ni.