Liverpool-in Man United inkhelh an zirtir
Anfield-ah inkhel turin Manchester United an kal a, point thum beisei mah se Liverpool-in inkhelh an lo zirtir - mualpho takin Ralf Rangnick leh a nauten Anfield an chhuahsan a, Man United tan Liverpool meuh el phak tur chuan kawng thui tak zawh a la ngai tih a lang.
Thawhlehni zan khan Premier League inkhelah Liverpool-in Manchester United an mikhual a, 4-0 in an lo sawp - Mohamed Salah chuan goal hnih a khung a, Luis Diaz leh Sadio Mane ten goal khat ve ve an khung bawk.
Liverpool-in hnehna an chan avangin Premier League hmahruaitu an ni a, mahse, nizan khan Manchester City an inlan a, Pep Guardiola naute result a zirin he thuziak i chhiar meuh chuan an dinhmun hi a danglam leh tawh ang.
United erawh an tlawm avangin season thara Champions League khel turin an dinhmun a hniam ta viau a, palina Tottenham Hotspur chu point thumin an phak lo mek - match khatin an khel tam zawk.
A goal hma
Anfield-ah chak tur zawk hre turin nghah rei a ngai lo - inkhel ṭan aṭanga minute ngana lekah Liverpool-in goal an khung nghal a, Salah-a'n chak taka ball um lutin Diaz tan a siamsak a, Colombian forward hian goal-a chantir turin harsatna a nei lo.
United fans an inring hman lo a, goal luh hma dan aṭangin chak tur a chiang nghal maiah a ngaih theih. Cristiano Ronaldo tel loa khel United-in nawr let an harsat a, Liverpool bawkin ball an chang tam.
Minute 22-naah Reds lam hian an goal hnihna an khung leh ta nge nge a, Sadio Mane siamsak nalh zet chu Salah chuan ṭha zetin goal-ah a lo chantir - Reds tan match riat zet goal a khung loh hnuah a khung ve leh ta!
Liverpool-in minute 25 pawh a tlin hmain goal hnih an khung der a, mualpho hmabak tih inhre mah se United an insiamṭhat phah lo a, hmana United player-te ang khan player-teah 'tih hram hramna' hmuh tur a awm lo.
A goal leh ta
United-in an 'fight' back thei lo a, puitling zawkten nuam ti taka naupang inkhel an zirtir ang maiin Reds-in nuam ti takin an khel thung a, mikhual team-in a tih ngaihna an hre lo a ni ber.
Minute 68-naah Mane chuan goal hmahruai khungtu Diaz siamsak chu goal-ah a chantir - United tlarhnungin awmzia an nei lo a, an ven tur an veng lo a, naupang chhia inkhel ang maiin an tlan a, player-ten an tih tur ber an hre lo.
Liverpool-in Harry Maguire captain-na hnuaia khel United lakah zahngaihna lantir an tum lo a, goal thum an khung tawh chungin an la duhtawk lo - hun tawp nan minute nga chauh a awm tawh tihah Salah a inlar leh.
Egyptian forward hian bench aṭanga luhtir Diogo Jota siamsak chu goal-ah a chantir a, Liverpool-in an mikhual lakah chiang takin hnehna an chang. United coach thar tur anga sawi Erik ten Hag-a'n inkhel a lo en a nih chuan hna a ngahzia a hria ang.
A hming Thiago
Liverpool tan Thiago Alcantara a khel ṭha takzet a, Spanish midfielder hian season hmasa khan a theihna tak pholang thei lo mah se tun season-ah erawh a thiamna tak tak hmuh turin a awm leh ta.
Midfield aṭanga Liverpool game siamtu a ni a, zaipawl kaihruaitu thiam takin a member-te zai a duh ang thala a vai ang maiin inkhel a kaihruai a, midfield aṭangin game a thunun hneh hle a, minute 80-naa lakchhuah a nihin fan-ten ding chungin an zahna an lantir hial.
Liverpool hian inkhelh chhung zawng khan 72% ball an chang a, vawi 14 shot an neih zinga panga chu goal zawna kal a ni a, goal li a lut - Old Trafford-ah 5-0 in an lo chak tawh a, United laka Premier League season khata goal riat aia tam khung thei awm chhun an ni.
United-in inkhelh chhung zawng khan vawi hnih shot an nei ve a, target-ah vawi khat a kal - Liverpool keeper Alisson-a thiam leh thiam loh pawh an enchhin thei lo.
Zirtirtu aiah zirlai
United-in coach atana Ralf Rangnick an lakluh khan Chelsea boss Thomas Tuchel, Bayern Munich coach Julian Nagelsmann leh Klopp-te football coaching kalphung kawhhmuhtu niin an sawi a, an fak nasa hle - hmanah chuan a lo ni mahna!
Klopp-a game kalphung 'gegenpressing' chu Rangnick- chin hmasak niin an sawi - mahse, kum 63 mi coach-in United a enkawl hnuah coaching-a a duhdan leh ngaihdan a sawi ṭhinte a tak ram a la chantir thei lo a, Klopp-a team a hmachhawn zanah a nauten awmze neiin game an khel thei lo mai a ni lo, an 'fight' thei eih lo.
Liverpool tan hliam tenau vangin Roberto Firmino inlan lo mah se Salah, Mane leh Diaz ten tlin takin an hna an thawk a, goal an khung vek bakah assist an nei vek bawk.
Tun season Premier League-a player pathumin club pakhat tana match khata assist leh goal an neih vek ṭum hnihna a ni. A hmasa zawk maw? Liverpool tho an ni a, Old Trafford-ah khan a ni thung!
A mualpho thlak a, a hrehawm a, a zahthlak bawk. A bik takin first half-ah khan tihngaihna kan hre lo a ni ber a, engmah kan ti lo. Kil tinah kan ngam lo a, chu chu a ṭha lo em em a ni. Liverpool khan an nihna dik tak an pholang a, kan phak rual an ni lo a ni e. Liverpool laka point hlawh chhuak tur khawpin kan ṭha tawk lo. - Ralf Rangnick, Manchester United manager
Nomawi chawi turin Liverpool chu an inpeih a, keini erawh kan ni ve lo. Eng anga inthlau nge kan nih sawi pawh a ṭul lo - kan ke ler aṭanga chhip ler thlenga inenfiah a, a dik lo lai kan zawn hmuh a ngai a ni. Season tawp thlengin kan bei dawn a, kan tan engkim a zo taah kan ngai thiang lo. Beisei tur kan la nei. - Bruno Fernandes, United midfielder
Kan khingpuite timualpho tura inkhel kan ni lo a, kan hmaa hna inchhawp chu kan thawk mai zawk a ni. United ṭhat lai a ni lo a, kan fan-te tan erawh result lawmawm tak a ni a, hlim an phu a ni - zaninah khan hlimna tam tak an chhar a ni. Zan hlimawm tak a ni a, minute 95 game thunun tur chuan ka inbeisei bik lo - mahse, minute 70 chhung chu game kaihruaitu kan ni a, minute 20 dang kha United-in thunun hran lo mah se harsatna erawh min siam ve tho a ni. - Jurgen Klopp, Liverpool boss
Ronaldo tan Anfield
Liverpool leh Manchester United inhalzia inhrilh nawn a ngai lo a, mahse, harsatna karah erawh khelmual chhunga an inhuatna dah ṭhain, Liverpool fan-ten tun hnaia a fapa chân Cristiano Ronaldo an tawrhpuina an tilang.
Ronaldo leh a kawppui Georgina Rodriguez te hian tun hnaiah fa phir an nei a, a hmeichhia zawk chu ṭha takin hring mah se a mipa zawk erawh a dam chhuak zo ve ta lo a, an fapa thih thu hi Thawhṭanni khan an puang.
Hei vang hian Thawhlehni zana Reds nena an inkhelah pawh Ronaldo a inlan thei lo a, Anfield-a inkhelah hian Liverpool fan-te chuan minute sarihnaah (Ronaldo jersey number) club hlapui 'You'll Never Walk Alone' an sa a, Ronaldo chhungkua an tawrhpuina an tilang a ni.