India squad-ah Puitea ko

AFC Asian Cup 2023 final round qualifier khelh tur inbuatsaih nan India coach Igor Stimac chuan player 41 a ko a, koh zingah K. Lalṭhathanga (Puitea) a tel - player 41 hi la thlitfim leh tur a ni ang.

Kerala Blasters midfielder Puitea bakah hian Mumbai City player pahnih Lallianzuala Chhangte leh Lalengmawia (Apuia) chu Mizo koh an ni a, player-te chu April 23-a training camp zawm tura hriattir an ni.

MPL lama Bethlehem Vengthlang FC midfielder hlui Puitea chuan, "India squad-a koh vawi khat ka nihna a ni a, a phurawm rualin chawlh kan hmang rei deuh hlek a, a huphurhawm khawp mai. Training hi zawm ngei turin ka inpuahchah mek," tiin Vanglaini a hrilh.

Mumbai City leh ATK Mohun Bagan player-te chu AFC Champions League leh AFC Cup an khelh mek avangin squad an zawm nghal thei dawn lo a, an club result a zira squad hi zawm mai turin an hriattir.

Training hi Bellary, Karnataka-ah neih tur a ni a, April 24 - May 8 inkarah training hi neih a ni ang a, hemi hnuah hian inelna neihna hmun tur Kolkata khawpuiah inelna neih thlengin training chhunzawm tur a ni.

AFC Asian Cup final round qualifier-ah hian team 24 an inel dawn a, group parukah team pali zel awma ṭhen hran an ni - group hmahruaitu leh pahnihna tiṭha pangate chu China-e khelh tur Asian Cup 2023 atan an tling ang.

India hi group D-ah Hong Kong, Afghanistan leh Cambodia te nen an awm ho a, anmahni group bik hi Kolkata khawpuiah khelh vek tur a ni dawn.