NCA Camp-ah Joseph Lalthankhuma

Board of Control for Cricket in India (BCCI) hnuaia awm Senior Selection Committee chuan National Cricket Academy a training camp an buatsaih a, camp zawm turin Mizo tlangval Joseph Lalthankhuma chu thlan zingah a tel.

Ramhlun Venglai player Joseph-a hian April 17, Pathianni khan Bangalore-a M. Chinnaswamy Stadium a training camp an buatsaih tur hi a zawm tawh a. Thawhṭanni aṭang khan camp hi ṭan niin May 12 thleng neih a ni ang.

Tun camp-ah hian BCCI hnuaia inelna a Plate Group aṭanga inel state hrang hrangte zinga che ṭha te thlanchhuah an ni.

Joseph-a chuan, "A tir lam chauh a la ni a, hautak zawka training an la kalpui chiah lo, mahse a ni chho thuai ang. Batting, bowling leh fielding coach ten min vil a, bowling-ah pawh pace leh spin coach an awm hrang.

"Batting lam thlurbing ka tum laiin bowling coach in a hnenah in report turin min ti a, min vawmtir ve nghal mai," tiin an training chungchang a sawi. Camp aṭang hian an thil duh bik pathum an zirtir thu a sawi bawk.