Rajasthan Royals-ah Remruatdika Ralte

Indian Premier League club Rajasthan Royals chuan tun, IPL 2022 kal laia an net bowler ni turin Mizo bowler ṭha Remruatdika Ralte chu an la.

Ramhlun Venglai tlangval Remruatdika hi Mizoram senior team tan inelna hrang hranga khel tawh a ni a. Nikum December 8-a Mizoramin Vijay Hazare Trophy a team ṭha zawka ngaih Bihar an hneh tumin wicket nga zet a la.

April 22, Zirtawpni hian IPL khelhna hmun Mumbai lam a pan ang. Hripui vanga inkaihhruaina dan angin a in khunghran hmasak hnuah Rajasthan Royals hi a zawm ang.

RVL captain Dika chuan, "Hun eng emaw chen aṭang khan kan inbe tawh. Vijay Hazare Trophy kan khelh zawh aṭang khan Rajasthan Royals sawi thawm hi chu a awm tawh. Mahse an reh leh deuh hnuah tun kartawp khan an rawn ti chiang ta a ni." tiin a sawi.

Cricket team hian inelna lian a hmachhawn dawnin inkhel tur squad an nei a, heng zinga player-te bakah hian team tana pawimawh tak an awm a, chu chu net bowler-te an ni.

Inelna lian an hmachhawn dawnin batsman-ten intuaihriam nan practice tam an mamawh ṭhin. Bowler hrang hrang an hmachhawn a ngai ṭhin. Hetianga practice-naah erawh squad pangngai a bowler-te tan ball vawm tam a ṭha ber lo, an taksa an khek a tul ṭhin.

Hei vang hian team hrang hrangten, an batter ten training an neih laia vawmsak ṭhintute hi 'net bowler' chu an ni. A tlangpui thuin player naupang leh tawnhriat la nei tam lo an ni ṭhin a, hmabak nei êng leh theihna nei sang nih a ngai bawk.