Premier League-ah Fulham an kir

Championship club Fulham chuan Thawhlehni zan khan Craven Cottage-ah Preston 3-0 in an hneh a, match li khelh hmabak nei chungin Premier League khel turin an inpetling. Manager Marco Silva chuan, "Fulham hi an awmna tur taka ka kir pui thei ka lawm," tiin Premier Legue khelh an phu thu a sawi.

Fulham hian Preston an hneh theih nan Aleksandar Mitrovic-a'n goal hnih a khung bakah Fabio Carvalho-a'n goal khat a khung bawk. Kum 29 mi Mitrovic hian season ṭha bik a hmang a, league match 40 aṭangin goal 40 tehmeuh a khung.

Mitrovic-a ropuizia nemnghehtu chu a record siam hian a ni a, Championship-a goal khung tam ber record Ivan Toney-a siam chu chiang takin a khum. Brentford striker Toney hian season liam ta khan goal 31 a khung a, Mitrovic hian goal kuaa a khung tam zawk bakah match li khelh tur a la nei bawk.

Fulham defender Tim Ream chuan, "Mi danglam bik a ni. A chungah hian rinna kan nghat a, goal a khung hteih kan ring. Marco pawhin a ring a, manager berin a rin tawh chuan engpawh a thleng thei a ni. Premier League-ah pawh goal a khung chhunzawm zel ang," tiin striker Mitrovic a fak.

Fulham hian April 23, Inrinni zan hian pahnihnaa awm Bournemouth an hmachhawn dawn a, hnehna an chang a nih chuan match thum khelh hmabak nei chungin Championship-ah an champion thei ang.

Mizote hriat hlawh Fulham
Fulham hi European club zinga Mizote hriat hlawh tak zinga mi a ni a, Premier League club an nih bakah club neitu vangte pawh a ni ang. Eyptian sumdawng hausa Mohamed Al-Fayed-a'n kum 1997 nipui khan pound maktaduai 6.27 in a lei a, hetih lai hian League One club chauh ni mah se Premier League a kaipui.

Al-Fayed fapa hi Dodi Fayed a ni a, Lady Diana Spencer nen an inkawp. August 31, 1997 khan Paris-a leiverh Pont de l'Alma-a an tlan laiin an car chuanna a chesual a, Dodi leh Diana te hian an nunna an chan phah.
Khawvelin an ngainat Diana vangin Dodi Fayed-a pa Al Fayed-a club Fulham-in ngaihven a hlawh phah a, Mizote pawhin an ngaihnat phah. Chutihrualin Fulham erawh kum 1879-a din daih tawh kh a a ni a, tun hmain first division pawh an khel tawh ṭhin.

Chutihrualin Premier League-ah erawh Al Fayed-a neitu nihna a chan hnuah an inpetkai a, kum 2001 khan a vawi khat nan an inpetling. London club hian kum 2014 thleng Premier League-ah an inham tang a, UEFA Intertoto Cup (2002) a an champion bakah kum 2010 khan Europa League-ah pahnihna an ni.

Kum 2013 khan tuna club neitu Shahid Khan-a'n Al-Fayed hnen aṭangin Fulham hi a lei chhawng a, a man hi pound maktaduai 150-200 inkar vela ngaih a ni. Championship-ah kum 2014 aṭanga 2018 thleng an awm hnuah 2018-19 season khan Premier League an rawn khel a, kum khat chauh an cham hnuah Championship-ah an tla lehnghal.

Championship-ah kum khat chauh an awm tihin Premier League khel turin an rawn tling lehnghal a, 2020-21 season khan 18-naah awmin an relgate lehnghal. London club hian coach ṭha Marco Silva an lalut a; Hull City, Watford leh Everton coach hlui hian season khatnaah Premier League a kaipui nghal a ni.