I League thawh khatna an khel zo

I League thawhkhatnaah Gokulam Kerala chuan match hnuhnung berah RoundGlass Punjab chu 3-1 in an hneh a, Kerala club hian hneh loh tawng loin match 12 aṭangin point 30 hmuin hmahruaitu an ni. Thawhlehni zan inkhelah Gokulam tan Aminou Bouba leh Luka Majcen ten goal an khung a, Punjab defender Josef Charles Yarney-a'n an lamah a ti lut bawk.

Tun season I League-ah hian team 13 an awm a, vawi khat ṭheuh an inkhel kual. A sang pasarihin champion nih tumin championship stage an khel chhunzawm dawn a, a hnuai lam parukin relegation stage an khel dawn. Mizo club Aizawl FC-in point 12 chauh an hmuh phak avangin relegate thei zingah an awm thung.

I League thawh hnihna hi April 23-ah khelh chhunzawm a ni dawn a, team tinin an point neih sa hi an nei chhunzawm dawn. A sang pasarih zingah Gokulam Kerala leh Mohamedan te chu champion tuma inum chho turah an ngaih theih a, top scorer tur pawhin Gokulam foward Luka Majcen (13 goals) leh Mohammedan striker Marcus Joseph (11) te an el tawk hle.

Team khat chauh relegate tur a ni a, table mawngphaha awm Kenkre-in point hnih chauh an hmuh avangin an relegate ngei a rinawm. Aizawl FC erawh I League-ah an inhamtan a rinawm a, chutih rualin champion tuma Kolkata an pan avangin championship stage an khel phak loh avangin tun season bikah chuan an hlawhchham a ni ber.