Milan hnehin Inter an chungnung

Inter Milan chuan an hmelma AC Milan 3-0 a hnehin Coppa Italia final an lut a, striker Lautaro Martinez chuan goal hmasa pahnih khungin a club hi a chakpui.

Semifinal lehlamah Juventus leh Fiorentina an inkhel a, result kan hre hman lo. A chak zawk leh Inter te hian May 11, Nilaini hian nomawi an inchuh dawn, final hmuhnawm tak a ni dawn tih a sawi lawk ngam.

Goal thum a lut
Milan club pahnih hian khelmual an inṭawm, a hming chu San Siro a ni. Semifinal first leg-ah goal a lut lo, tun ṭum inkhelah hian Inter chu mualneitu zawk niin, fans pawh an nei hnem zawk; an thawm a ṭha hle.

Thawhlehni zan inkhelah Inter tan Martinez-a'n minute lina lekah goal a khung ṭan a, mual sir aṭanga Matteo Darmian-a cross chu harsa vak loin yard 12-a hla aṭangin a lo khung, striker goal ṭha pangngai tak a ni.

Milan an awm mai mai bik lo, striker Olivier Giroud leh Theo Hernandez ten si phurh sut tum mah se goalkeeper Samir Handanovic an paltlang zo lo a, anmahni lamah bawk goal a lut leh ta zawk.

Goal hmahruaitu khungtu Martinez bawkin minute 40-naah an goal hnihna a khung a, chawlhlawk hmain hattrick a siam teuh hle. Corner aṭanga a ball tauh chu a lut lo hlauh, vannei deuh se chuan goal thum a khung ang. Hun tawp dawnah Robin Gosens-a'n chak a nemnghet.

Lunglawm a kim
Season hmasa khan Martinez hian Inter Milan hi Serie A nomawi a chawipui tawh a, kuminah pawh champion leh thei dinhmunah an ding. Tunah chuan a goal hnih hmanga Milan hnehin Coppa Italia final an lut leh ta.

Kum 24 mi Martinez chuan, "Ka goal pahnih hi stadium chhunga ka inkhel min entu ka nu leh pa tan ka hlan, anni min uapna hnuaiah hnehna changin goal ka khung a, hei aia hlu leh lawmawm hi a awm thei leh tawh chuang lo ang.

"Club hian ka chungah rinna an nghat ngam a, chuvangin kei pawhin Inter jersey hi chhuang taka hak chhuah ka duh. Engkim sawi hun a ni kher lo, mahse Inter-ah hian ka hlimin ka lawm tawk tih erawh ka zep lo," tiin a sawi.

Martinez hi European club lian tam takin an hnena khel turin an duh, indin thar lai Barcelona nen pawh sawizawm a ni tawh ṭhin. Mahse, tuna a lan dan chuan season tharah pawh Inter Milan hmatawng a la nih chhunzawm zel hmel hle.

Pioli a lawm lo
Second half-ah Milan hian Ismael Bennacer hmangin goal an khung a, goal phurh sut ṭhenah inngai hman mah se goal a luh hma hian Pierre Kalulu chu offside niin an ngai a, dan dik takin goal khung niin lang mah se hnawlsak an ni.

Milan an vannei tawk lo bawk - Inter aiin target zawna shot pawh an nei hnem zawk a, amaherawhchu keeper Samir Handanovic an paltlang theih loh bakah, winger Ivan Perisic chuan an lama lut tur goalline aṭangin a pet chhuak hman.

AC Milan manager Stefano Pioli chuan, "Team ṭha tak lakah goal kan chhuah hma, mahse dan dik takin kal ni ila chuan 2-1 in kan hnufual ang a, goal khat dang khung belh turin kan bei nasa zual bawk ang.

"Mahse, thutlukna dik lo kan tuar, kan khelh dan thlir chuan 3-0 a chak lo zawk tur chu kan ni lo. Inter keeper Handanovic pawhin sawisel tur a hre miah lo chunga kan goal an pawm lo kha chu a mak," tiin a lungawi lo hle.