Freiburg-in final an lut

DFB Pokal semifinal-ah Freiburg chuan Thawhlehni zan khan Hamburger SV chu 3-1 a hnehin final an lut. Freiburg hian final-ah nizana RB Leipzig leh Union Berlin inkhela chak zawk an hmachhawn ang.

Volksparkstadion-ah mikhual team-in bul an ṭan ṭha a, Freburg-in minute 11-naah Nils Petersen hmangin hma an hruai hnuah minute 17-naah Nicolas Hofler hmangin an khung belh.

Minute 35-naah ṭul lo takin Hamburger defender Moritz Heyer-a'n box chhunga tlu tawh Nico Schlotterbeck chu a nghawngah a pet fuh a, penalty a chawi. Vicenzo Grifo-a'n chiang takin an pet goal a, 3-0 in Freiburg-in hma an hruai.

Hun tawp dawnah Hamburger-in Robert Glatzel hmangin siphurh an sut ṭhen a, goal dang a luh belh lo. Freiburg-in 3-1 in hnehna an chang a, DFP Pokal-ah champion thar an awm dawn. German Cup-ah hian Freiburg bakah nizana inkhel Leipzig leh Union Berlin te an la champion lo.