Game 2-ah Suns an chak lo

Phoenix Suns hi harsa vak loa tlang tura ngaih an ni, mahse NBA playoff chinah chuan chiangsa tih ngawt theih a ni lo. Nimin zing game 2 inkhelah New Orleans Pelicans chuan Suns hi 125-114 in an hneh, best of seven series-ah 1-1 in an inhnehtawk mek.

Arizona-a inkhelah Brandon Ingram-a'n point 37 a neih bakah rebound vawi 11 a la, a ṭhiante basket neih tur vawi kua siamsak bawkin Pelicans a chakpui a, game 3-ah pawh an innghahna a ni leh ang.

Phoenix tan Devin Booker-a'n point 31 a nei a, quarter thumna an khelh laiin malpui hliam vangin a chhuah a ngai; khel tluan thei ni se chuan result a danglam phak mai thei.

Suns coach Monty Williams chuan, "Book hoa inkhelh hi a nuam, match lehpekah pawh tel leh nghal thei se tih hi duhthusam a ni," a ti a, a player pawimawh hi eng chena rei nge a chawlh dawn tih erawh a sawi thei bik lo.

Inkhel dangah Miami Heat chuan Atlanta Hawks 115-105 in an hneh a, series-ah 2-0 in hma an hruai. Hnehna an chan theih nan Jimmy Butler chuan point 45 a nei a, basketball inelna sang berah hian point a neih hnem ber ṭum a tawng.

NBA Playoff - Nimin Results
Eastern Conference First Round
Atlanta Hawks 105 - 115 Miami Heat
(Heat hian series-ah 2-0 in hma an hruai)
Western Conference First Round
Minnesota Timberwolves 96 - 124 Memphis Grizzlies
(Series-ah 1-1 in an inhnehtawk mek)
New Orleans Pelicans 125 - 114 Phoenix Suns
(Series-ah 1-1 in an inhnehtawk mek)