Virat Kohli a 'duck out'

Thawhlehni zan Indian Premier League inkhelah Royal Challengers Bangalore (181/6) in Lucknow Super Giants (163/8) chu 12 runs-in an hneh a, Faf du Plessis-a'n 96 runs siamin RCB chakpuitu a ni.

Bangalore an chet ṭhat laiin captain hlui Virat Kohli erawh a che chhe tluang zel. India captain hlui Kohli hian ball khat chauh a hmachhawn a, pavillion-ah a kir.

Kum 33 mi Kohli hian competitive match 100 a khelhah century a siam tawh lo a, khawvela batter ṭha ber zinga mi hian hun harsa a tawng mek. Kohli match 100 khelh hi 17 Tests, 21 ODIs, 25 T20Is bakah IPL match 37 a ni a, India team-a hmun nghet chang reng turin insiamṭhat a mamawh hle.

Zanin dar 7:30 hian Mumbai Indians leh Chennai Super Kings te an inkhel dawn. Champion lai Chennai hi vawi khat chiah an la chak a, champion ngun ber Mumbai-in chak an la nei lo.