Chak mamawh Barca inlan dawn

Xavi awm hnuah Barcelona-in fak an hlawh hman viau a, mahse, tun hnai an result avangin sawisel an tawk ṭan leh tawh - Europa League quarterfinal aṭangin petchhuah an ni a, an league match hnuhnung berah Cadiz an ngam lo bawk.

Barca hi zanin dar 1:00-ah an inlan leh dawn a, season thara Champions League khelh la beisei ve reng Real Sociedad nen an inkhel dawn. Catalan club leh Sociedad inthlauhna hi point nga chauh a ni a, Barca tan chetsual a thiang lo.

Xavi-a'n nomawi a sawi rik hnuah La Liga nomawi an mangṭha tawh thu a sawi leh tawh zawk a, an tum ber chu season thara Champions League khelh phak a ni - table-ah pahnihna ni mah se pathumna Sevilla leh palina Atletico Madrid te nen an point hmuh zat a inang vek.

Pedri awm lohna
Barcelona tan an rawlthar Pedri a ṭangkai takzet a, mahse, Spanish midfielder hi hliam vangin tun season chhung a inlan a rinawm tawh lo - ani inlan thei lo tur hi Barca tan a pawi thui thei.

Catalan club hian tun season-ah Pedri hoa league match an hmachhawnah 89% hnehna an chang thei a, point 36 beisei theih aṭangin point 32 an hmu thei. Mahse, Pedri tel loa La Liga match an khelhah 49% chiah hnehna an chang a, point 57 hmuh theihah 28 chiah an hmu.

Barca tana Pedri ṭangkaizia a lang a, a tel loin eng nge an an zel dawn hriat a châkawm. Hetihrual hian Barca tan thu hriat nuam a awm tho a, Cadiz laka hrem vanga inlan thei lo defender Ronald Araujo leh hliam vanga inlan lo centre back Gerard Pique te chu lo kir thei tawh tura beisei an ni.

Siamrem a hun
Xavi-a hnuaia Barca-in fak an hlawh a, mahse, match hnih a zawna a tlawm meuh chuan a chhiatna lai chu Spanish media-te titi tui ber a ni leh tawh - Barcelona legend hian a club hlui hi match 31 a kaihhruai tawhah vawi 17 chiah hnehna a chanpui a, a win percentage hi 54.8% a ni.

Ronald Koeman khan 58.21% a chakpui thei a, Dutch coach aiin Xavi win percentage a chhe zawk tihna a ni a, kum 2002-a Charly Rexach (50%) hnua win percentage nei chhe ber a ni bawk. Xavi tan insiamrem a hun a, Ferran Torres, Ousmane Dembélé leh Pierre-Emerick Aubameyang te tan an pu tan hna ṭha taka thawh a ṭul tihna a ni bawk.

Real Sociedad hian hliam vangin Mikel Oyarzabal, Nacho Monreal, Carlos Fernandez leh Ander Barrenetxea te an la chhawr thei dawn lo a, hrem vangin David Silva a inlan thei dawn lo bawk. Mahse, he team hian Alexander Isak leh Alexander Sorloth te an la nei tih hriat erawh a ṭha.