Burnley tan beisei tur a awm em?

Zanin dar 12:15 hian Burnley-in an mual Turf Moor-ah Southampton an mikhual dawn a, Clarets tan Premier League khel chhunzawm turin Saints hneh hi a pawimawh hle.

Burnley hian kum 10 chhung an chhawr tawh manager Sean Dyche chu an ban a, manager nei loin an awm mek. Clarets hian kartawp khan West Ham an hmachhawn a, 1-0 a hma an hruai hnuah Maxwel Cornet-a'n penalty a hlah avangin 1-1 in inkhel a tawp.

Saints an hmachhawn hunah Mike Jackson-a'n manager lailawk hna a thawk chhunzawm dawn a, point hmuh ngei an inbeisei ang. Burnley hian inhliam vangin Ashley Westwood bakah captain Ben Mee, Erik Pieters leh Johann Berg Gudmundsson te an chhawr thei dawn lo.

Chutihrualin Clarets hian chhuanlam an nei thiang lo, match 31 aṭangin point 25 hmuin relegation zone-ah an awm mek. An chunga awm Everton-in match 30 aṭangin point 28 an hmu a, Frank Lampard-a hote hian nizan khan Leicester City an hmachhawn avangin an inkar hi a la zau leh thei bawk.