Arsenal ke pen nghawrah Stamford Bridge a chim

A la tawp lo, beiseina a la awm - Premier League nomawi inchuh boruak a ngaihnawm tluk zetin palina nih tum inum boruak pawh a nung. Arsenal chuan Chelsea 4-2 a hnehin Champions League khelh phak an beiseina an chhawm nung thar.

Eddie Nketiah-a'n goal hnih a khung bakah Emile Smith Rowe leh Bukayo Saka ten goal khat ve ve an khung a, an pathum hian Arsenal academy (Hale End) chhuak an ni; Blues goal hnih hi Timo Werner leh Cesar Azpilicueta te khung a ni thung.

Arsenal hian Inrinni tlaiah Manchester United chu Emirates Stadium-ah an mikhual leh nghal dawn. Liverpool laka tlawm hlim Man United hian palina nih phak an la beisei tho avangin inkhel a hmuhnawm dawn tih a sawi lawk ngam.

Thawhlehna
Hmanni lawk kha a la ni, ni tam a la liam lo. Arsenal hi palina ni turin an dinhmun a ṭha tawk a, an elpui Manchester United leh Tottenham aia khel tlem chungin an sang zawk, engkim kha an kutah a awm hman.

Mahse, Arteta naute hi hliamin a tlak buak a, squad neih chhah loh tuarin team nem zawk Crystal Palace, Brighton & Hove Albion leh Southampton te an ngam lo vek, point kua hmuh theihna turah engzatmah an hmuh belh lo.

Spurs-in an tlanpel hman a, an hnuaia mi Man United pawhin an nih rual hman. Tunah erawh Antonio Conte naute an nih rual leh tawh, an elpui pahnih hi an la hmachhawn ve ve dawn avangin UCL khelh leh khelh loh chu an kuta awm a ni leh ta.

Chak lo Chelsea erawh pathumna an la ni chhunzawm a, an chesual viau a nih ngawt loh chuan Thomas Tuchel-a naute hi chuan UCL ticket an neih tlang a rinawm. Chutihrualin match khelh tur pasarih an la neih avangin hmabak a la tam.

Hale End chhuak
Thlasik bazarah Pierre-Emerick Aubameyang a chhuak a, striker Alexandre Lacazette-a'n a hmun ruak luahin goal a khung thei lo. Laca hi damlohna vangin a fit tawk lo a, duhthlan tur chu tun season-a league goal la khung lo Eddie Nketiah chiah a ni.

Minute 13-naah Andreas Christensen tihsual nangchingin Nketiah hian ball a lalut a, chiai loin goal a khung. An hum rei lo thung, minute li hnu lekah Werner hmangin Chelsea lamin an chhang let nghal zat, boruak a nung hle.

Mawi taka ball an inpek kual hnuah Smith Rowe chu a hmawr bawktu a ni, tun season a goal 11 nan box pawn aṭangin goal class sang a khung. Chelsea keeper Edouard Mendy tan dan phak a ni lo, mahse Mason Mount siamsak hmangin Azpilicueta-a'n a sut leh tho.

Chelsea tlarhnung tihsual vang bawkin Nketiah-a'n goal a khung belh a, hun tawp hmain Saka chuan a penalty hlawhchhuah a khung bawk. England international hian Euro 2020 final-a penalty a hlah hnua a pet lehna hmasa berah a hlah nawn lo.

Chelsea an buai
Stamford Bridge-ah entu mipui 32,249 chauh an awm. UK sorkarin Roman Abramovich a hrek avangin season tluana ticket nei sa lo tan lei belh theih a ni lo a, stadium khat entu an awm thei lo - club neitu hrek lo se la chuan Arsenal mikhual turin fans an pungkhawm hnem ang.

Anmahni mualah ngei Blues hi a zawnin match thum an tlawm ta. Heng match pathumah hian goal 11 tehmeuh an chhuah; Brentford (4-1), Real Madrid (3-1) leh Arsenal (4-2) an hneh loh dan en hian an tlarhnung a phui lo takzet tih a lang.

Thiago Silva aia bul ṭan Christensen-a'n tihsual a ngah, mual sira awm Marcos Alonso-a'n Saka a dang thei lo, a tal put fo. Captain Azpilicueta pawhin tihsual a nei, goal khung mah se penalty a chawi, inkhelh banah fans lam nen buaina an nei zui hial.

Match an khelh hnem avangin Thomas Tuchel-a'n a naute a siksawi kual a ngai ṭhin, hetiang boruak karah hian tlarhnung remphui a harsat rih a ni. Pathianni zanah West Ham nen London Derby an khel zui dawn, insiamrem hman ngei an tum ang.

Goal li kan khungte kha kan academy chhuak vek an ni a, a lawmawm dan a zual bik. Tun hnai kar hnih chhung chu min ṭantute an lawm lo, a chhan chu kan result vang a ni. Tunah erawh an lawmna kan siamsak ve leh thei ta hi ka lawm.- Mikel Arteta, Arsenal manager

Toni Rudiger a telin Brentford leh Real Madrid lakah goal sarih kan chhuah, chuvangin goal kan chhuah hi player mal vang a ni lo. Tun ṭumah ani a khel lo a, midang hun a thleng ve a ni mai, tumah mimal dem theih an ni lo. -Thomas Tuchel, Chelsea manager