Man United manager thar Erik Ten Hag

Manchester United chuan nimin khan thuchhuah siamin manager atan Erik ten Hag an lakluh thu an puang. Dutch manager hian tun season zawh a ṭanga June 2025 thleng contract a ziak a, kum khat dang pawhsei theih dan a awm bawk.

Man United football director John Murtough chuan, "Erik hian Ajax-ah a theihna a pholang a, Europe-a coach hlawhtling ber zinga mi a ni. Attacking football a khelh bakah player naupang zawk hmasawnna a ngai pawimawh bawk.

"Erik nena kan inbiaknaah ropuina rama Man United hruai kir tura hma thlir ṭha tak a neih avangin amahah hian rinna sang tak kan nei. Season khelh hmabakah Ajax hlawhtling taka enkawl turin duhsakna kan hlan a, nipuia kan zinga a rawn tel hun kan nghakhlel hle," tiin a sawi.

Kum 52 mi Ten Hag hian Dutch club Go Ahead Eagles leh Utrecht bakah Bayern Munich reserve team te a enkawl tawh a, hming a chherna tak erawh Ajax a ni. Dutch manager hian Ajax hi Eredivisie-ah vawi hnih a champion pui tawh a, tun season-ah a lungthu kim nana champion leh thei dinhmunah a ding. Eredivisie bakah hian Dutch Cup-ah ṭum hnih a champion pui a, Johan Cruyff Shield a chawipui bawk.

Ten Hag chuan, "Manchester United manager atana min ruat hi ka tan chuan chawimawina a ni a, chona thar hmachhawn ka châk tawh hle. Club hian sulhnu ṭha tak a nei tih ka hria a, fan-te inpekzia ka hre bawk. An phu anga hlawhtlinna chanpui turin theihtawp ka chhuah ang," tiin a sawi a, Ajax chhuahsan har a tih thu a sawi tel bawk.

Man United hian Ole Gunnar Solskjaer an ban hnuah manager lailawk ni turin Ralf Rangnick an lalut a, German manager hnuaiah an talbuai hle. United hi an match hnuhnung berah an hmelma Liverpool lakah 4-0 in an mualpho a, Ten Hag-a hmabak a hautak khawp ang.

Ten Hag hian German club pahnih sawmna a hnar nia sawi a ni a, Man United dinhmun siamṭha turin hun pe rei turin a ngen bawk. Dutch manager hi kum thum bakah kum khat dang pawhsei theihna contract pek a ni a, Manchester City leh Liverpool nena an inkar zau tak a tizim thei ang em, tih chu hunin a hril ang.