Wimbledon leh ATP ngaihdan a inang lo

All England Lawn Tennis Club (AELTC) leh Wimbledon chuan Russian leh Belarus player-te chu grass court inelna lianah an tel a phal dawn lo, an thutlukna hian sawi zui a hlawh nghal. Grand Slam dang erawhin player zingah thliar bik an la nei lo.

Association of Tennis Professionals (ATP) leh Women's Tennis Association (WTA) te chuan Wimbledon thutlukna hi an thlawp lo tih an sawi nghal. Mipa leh hmeichhe tennis thuneitu sang hian politics chu infiamna huanga pawh luh an duh lo a ni.

Russia leh Ukraine buainaah Belarus hian Russia a ṭanpui a, hei vang hian Russia bakah Belarus chu ram leh ram inelnaah chuan hrem an ni tawh sa, an player-te erawh neutral athlete ni chunga tournament an khelh an phalsak thung.

Infiamna peng hrang hrangah pawh Russia hi hrek an ni a, tun hnai khan UK chuan Wimbledon chungchang pawh ngaihtuah a nih thu an sawi. Thutlukna hi sorkar siam ni lo mah se, tennis thuneitu lam hian sorkar duh danin thu an titlu tih erawh a lang thei.

ATP chuan thuchhuah siamin, "Ram leh sakhuana vanga inthliarna hi kan duh ngai lo a, hei hi Wimbledon nena kan inrem dan pawh a ni lo. Tournament khel tur chu ATP ranking hmanga thlan tur a ni zawk, he thutluknain a nghawng tur hi ngaihtuah leh a ni ang," an ti.

Hmeichhe tennis thuneitu sang WTA pawhin Wimbledon an thlawp loh thu sawiin, "A makin a lungawi thlak loh hle, hei chuan infiamna hmai a ti bal," an ti a, an kal zel dan tur chu an la ngaihtuah ṭhat leh tur thu an sawi bawk.

AELTC leh Wimbledon thutlukna hi thlawptu an awm a, chutihrualin player leh tennis pawl langsar ho erawh chuan an thlawp lo. Mipa world number 1 Novak Djokovic chu ṭawng chhuak hmasa zinga mi a ni a, na takin a sawisel.

Serbian star chuan, "Infiammi, tennis player-te hian indona chungchangah engmah tihsual an nei lo, indo an duh lohna hi an lantir fo zawk a ni. Infiamna leh politics chawhpawlh a nih chuan, a nghawng chhuah a ṭha lo hle," tiin a sawi.

Wimbledon champion hnem ber, vawi kua ngawt lo champion tawh Martina Navratilova chuan, "Thutlukna dik lo a ni, hei chu buaina chinfel dan kawng dik niah ka ngai lo. Tennis chu infiamna thianghlim a ni a, politics-in a tihchhiat ka phal lo," a ti.

Russian leh Belarus player an inlan thei lo a nih chuan, mipa world number 2 Daniil Medvedev chu tel thei lo tur langsar ber a ni ang.