A chung berah Manchester City

Premier League champion lai Manchester City-in Nilaini zan khan Brighton & Hove Albion 3-0 in an hneh a, Pep Guardiola hoten Liverpool zuan khumin table chungah berah an awm.

Man City hian first half-ah goal khung thei lo mah se second half-ah Riyad Mahrez, Phil Foden leh Bernardo Silva te hmangin an khung. Citizens hian match 32 aṭangin point 77 an hmu a, khelh zat inangah Jurgen Klopp-a hote aiin point khatin an hmu tam zawk.

City an kim
FA Cup semifinal-ah Pep Guardiola-a'n sa huai a ser lo a, inelna a ngaih pawimawh zawk Premier League lamah erawh a player neih ṭhat nen bul a ṭan.

Keeper Ederson-a'n bul a rawn ṭan a, bul ṭantu zingah Kevin de Bruyne rawn tel leh bawkin an goal an bawh a na hle. First half-ah goal khung lo mah se Riyad Mahrez-a'n chance ṭha bik a hlah a, De Bruyne leh Bernardo Silva ten an khung teuh viau bawk.

Arsenal leh Tottenham hnehtu Seagulls-in point hmuh tumin a kaw tawpin ṭang mah se an ṭang tluan thei lo. Minute 53-naah De Bruyne-a thawhrah sengin Mahrez-a'n goal hmahruai a khung a, Brighton tlarhnung an ṭhiah danah vanneih a tel.

Goal khat luh hnuah Man City-in nuam sa zawkin an khel thei a, minute 65-naah Foden-a ball pet chu Brighton defender-ten an dan kawi hnuah goal-ah a lut.

City goal hmasa pahnih vanneih vang a tih theih a, goal thumna erawh a 'class' hle. Minute 82-naah De Bruyne-a'n fing takin Bernardo Silva tan a siamsak a, Portuguese midfielder hian goal ban hrualah a pet lut.

Danglamna thlentu KDB
Belgian midfielder De Bruyne-a'n goal a khung lo a, Gabriel Jesus-a'n a thlak laiin mipuiin standing ovation an pe. Hei hian KDB khelh dan a sawifiah.

Man City manager Pep Guardiola chuan, "Man City ka zawm hmain De Bruyne hi a awm tawh a, hetiang player ṭha an lakluh avangin club hi ka lawmpui. Player danglam bik a ni a, mi ṭha tak a ni bawk. A dam ṭhat a, a rilru put hmang a dik phawt chuan dan theih a ni lo. Inkhelah danglamna thlentu a ni a, season tawplam a khel ṭha hle," tiin KDB a fak.

Spanish manager Guardiola chuan, "Chhiarkawp dan ang thlapin Champions League kan khel dawn tih a chiang ta, UCL khelh tuma inchuhte hi team ṭha tak vek an ni a, kan tan pawh a hlu a ni," tiin an thlen china a lawm thu a sawi.

Nomawi inchuh
Man City hian Watford, Leeds United, Newcastle United, West Ham United, Wolves leh Aston Villa te an la hmachhawn dawn a, an chak vek chuan an champion ang. Chutihrualin Pep Guardiola hote hi vawi khat pawh an chesual a nih chuan Liverpool-in an lehthal thei thung. Reds hian Everton, Newcastle, Tottenham, Aston Villa, Southampton leh Woves te an la hmachhawn ang.

Guardiola chuan, "Kan a lo. Point hnih kan hloh chuan Liverpool an champion dawn. Kan chak vek chuan kan champion dawn a, player pawhin an hria. Inkhelh harsa kan hmaah a awm a, Brighton laka kan khelh angin kan khelh chhunzawm a ṭul. Kan khel ṭha chhunzawm a nih chuan champion kan lawm ang a, kan thei lo a nih chuan Liverpool kan lawmpui thung ang," tiin champion tur a la chian loh thu a sawi.