IPL MCL

Nipui vanglai Ṭau thla ni sen sain san lam a pan sauh sauh ang bawkin, cricket khawvel khawmpui lian Tata Indian Premier League chuan a vawr tawp thleng turin a invawrh lawp lawp mek. Team 10 inelna, ṭum 14 ṭheuh an inlanna tur group stage-ah a chanve kan thleng chho leh ta reng mai.

A thar a ṭha, a hlui a chhia
Kumin aṭanga rawn inlan ṭan Lucknow Super Giants leh Gujarat Titans te mi rin phak bakin an che ṭha a, team hlun - hun rei tak aṭanga tual lo chai ve hrep tawh ang maia tlangnelin, table chunglamah an awm.

IPL ṭum 14 neih tawha champion zing ber leh record nei ṭha filawr, huhang ngah pahnih Chennai Super Kings leh Mumbai Indians ten chak ni hmel reng an hmu ve thei lo thung. Putar, ngaihnawm deuha vanglai thawnthu sawi, amaherawhchu tiang hawl lova che hleithei lo chante pawh an ang ta hle.

Banrek hmangthiam inlarna
Cricket ball vawm thiamte zingah pawh a nazawngin an thiam ve loh, banrek hmanga ball ṭhuai vir (wrist spinner) ten tuna kan hmuh chinah mit an la hle. He themthiamna (art) hi engmaw lai khan cricket khawvelah hian hmun chang tawh meuh lo.

Ball ṭhuai vir hi a har vang leh vawm dik reng a har bakah ball chhia vuak nuam pek a awl bik avangin limited over-ah team ṭhahnem takin an hmang ngam tawh lo. Hman ni lawka fam chang ta Shane Warne chhit nun mei chher thi mai tur Yuzvendra Chahal, Kuldeep Yadav leh Wanindu Hasaranga ten an rawn chhi nung leh ta.

Tun ṭum IPL-a batter ṭhahnem tak mut titui lo khawpa an han tal vel hmuh hian, cricket khawvel spin department dinhmun a hrisel hrih e, kan ti thei mai awm e.

Fuh leh ṭhelh
Jose Buttler-ten awlsam takin century ṭum hnih an hlap chhuak der a, Royal Challengers Bangalore captain Faf du Plessis te lahin IPL history-a ṭum hnih nan century siam lo chiah chiah velin 96 runs te an vaw chhuak.

Engtik niah emaw chuan IPL-ah hian double century siamte pawh hi kan hmuh thuai mai a rinawm ta. Man to ber Ishan Kishan an thawm a la nei hlei thei lo a, India captain hlui Virat Kohli-a lallukhum te pawh a tuiek ṭan ta kan ti thei mai tawh em? Hunin a hril zel ang chu.

Tualzawl kut pui
Hetia Tata IPL boruakin cricket khawvel a chiah lai mek hian, kan Zotlang ram nuam lamah pawh Byju's Mizoram Cricket League chu Sihhmui Cricket Khelmual lamah khelh vut vut a ni.

Twenty First Century Media lamin khawvel entheih turin live in an pe bawk nen, Mizoram Cricket hi a zuan in a zuang dawrh kan ti lo thei lo. MCL zawhah Mizoram pawl lian ber Central YMA leh Cricket Association of Mizoram-in Inter Branch Cricket Tournament an buatsaih chhunzawm dawn a, cricket-in hma a sawn chho zel.

CAM hnathawh
India rama crikcet thuneitu sang ber BCCI-in Mizorama cricket thuneitu sang ber CAM a hnuaia awm tura a pawm hnu hian hmasawnna tak tak a awm chho ṭan. Tuna kan thailan mek MCL-a team pakhat Ramhlun Venglai player Remruatdika chu Rajasthan Royals-in net bowler turin an la.

Remruatdika hi season liam ta khan age group level aṭangin Mizoram tan first class cricket a khel ṭan chauh a, batsman ṭha ho a vawmsak dawn bakah an zingah tual a chai dawn. Jos Buttler, Devdutt Padikkal, Sanju Samson, Rassie van der Dussen leh Shimron Hetmyer te rual ho a vawm sak dawn a, mumang ram te pawh a ang rum rum.

Tin, Ramhlum Venglai rawlthar vek, Joseph Lalthankhuma chu National Cricket Academy, Bengaluru-ah a training dawn. Joseph hi season liam ta khan under 19 aṭangin senior team-ah a tel a, a tal na nghal hle. A inzirna tur NCA hi coach ṭha ber ber leh India ram ram hmun danga player ṭha ber ber te inzirna a ni a, Mizo rawlthar hian hma a sawn phah khawp ang.

He Silly Point thuziak ngeia kan lo thailan tawh. Engtik niah emaw chuan Mizo hming hi IPL, India jersey-ah a la inchhu ve ang kan tih kha, rin aia hma hian a rawn thleng dik dawn te pawh a ni mahna le? Zawlnei thusawi dik lo, a hun hmaa thleng an tih zinga chhiar tel ka lo ni ta nih pawhin lawm takin ka pawm nang nge.