Benzema 'NIL' zanah Real an chak

Karim Benzema chuan penalty vawi hnih a pet goal lo a, mahse, Real Madrid an tlawm phah lo - an mikhualna ramah 3-1 in Osasuna an hneh a, La Liga nomawi an hnaih zel.

Real Madrid tan David Alaba, Marco Asensio leh Lucas Vazquez ten goal khat ṭheuh an khung a, Osasuna tana Ante Budimir goal khungin awmzia a nei phak lo.

Mikhual Real-in hnehna an chan avangin La Liga nomawi chawi turin an nghah rei a ngai tawh lo - match nga khelh tur an la neihah point li an hmuh chuan an champion ang.

Hetihlai hian Atletico Madrid chuan goal khung loin Granada an inhnehtawkpui a, top four huangah la awm mah se season thara Champions League khel turin insiamṭhat an mamawh.

A goal hma
Mualneitu Osasuna-in Real lakah tlawm bik an tum lo a, inkhel ṭantir aṭangin boruak ngam takin an khel - mahse, Real-in goal an khung hma a, minute 12-na lekah Alaba chuan goal hmahruai a khung.

Austrian full back goal khung tur hi Benzema chuan a siamsak a, a 'shot' hmasak chu Osasuna keeper Sergio Herrera chuan dansak mah se a per lehlam chu goal-ah a chantir leh ta tho a ni.

Mahse, Osasuna an hnufual rei lo. Goal an chhuah aṭanga minute hnihna lekah Budimir chuan si phurh sutna a rawn khung ve leh a, Real fans hlim au thawm pawh a reh hman lo.

Minute 45-a ni tihin hmahruaitu ni loa chawlhlawk hman Real-in an hreh tih an lantir a, Asensio leh Eduardo Camavinga te inkawpin box chhunga ball an lakluh hnuin Dani Ceballos chuan a hmawr bawk a tum - Herrera bawkin a lo dang a, mahse, a per lehlam chu Asensio chuan goal-ah a chantir ta tho.

Benzema a NIL
Chawlhlawk hman a nih hnuah Real-in hahdam taka chak theihna chance an nei zui a, mahse, Benzema nil zan nen a innang - French striker hian penalty vawi hnih an hmuh chu goal-ah a chantir thei tlat lo.

Minute 52-naah Chimy Avila chuan penalty area-ah a kutin ball a tawk fuh a, Benzema a lo pen chhuak. Mahse, European football-a striker 'hot' ber pawl penalty pet chu Herrera chuan a dansak!

Benzema-a'n minute sarih liam hnuah chance a nei nawn. Osasuna right back Nacho Vidal chu Rodrygo lakah a foul a, penalty a chawi - mahse, Herrera-a'n Benzema a hre ve lo a, a dang nawn.

Kum 34 mi Benzema hian tun season inelna hrang hranga match 40 a khelhah goal 39 a khung a, penalty pakhat tal kha khung ni se chuan goal 40 a khung tling ni mai tur a ni a, a ui vawng vawng ang.

A tawpah Real
Benzema-a'n penalty vawi hnih a hlah avangin Real-in 2-1 ah lungawi an zir a ṭul dawn niin a lang hman a, mahse, Vinícius Júnior-a siamsak chu Vázquez chuan hun pek belh minute ruknaah a khung ve leh a, 3-1 in Real an chak.

Real-in nomawi an hnaih zel lai hian an inlan hmaa inlan, champion lai Atletico Madrid erawhin Granada lakah goal an khung thei lo a, 0-0 a inhnehtawkin point khata lungawi an zir.

Atletico chak zo lo mah se table-ah pahnihna an ni a, hei erawh nizana Sevilla leh Barcelona te result a zirin la danglam leh thei a ni.

Madrid khaw club hian match 33 an khelh aṭangin point 61 an nei a, pangana Real Betis aiin point li chiahin an sang zawk - match nga khelh tur an la neih ve ve avangin Atletico tan fimkhur a ṭul.