Everton leh Foxes inhnehtawk

Nilaini zan Premier League inkhelah tlak hlau Everton chuan Leicester City an chelh a, hun pek belha Richarlison goal khung hmangin Foxes chu 1-1 in an inhnehtawkpui.

Mikhual team Leicester hian minute ngana leka Harvey Barnes-a goal hmangin hmahruaina goal an khung a, Brendan Rodgers-a hoten hei hi an chakpui mai dawna a lan laiin Richarlison chuan hun pek belhah si phurh a sut a ni.

Merseyside club an 'comeback' theih nan bench aṭanga luhtir Dele Alli leh Salomon Rondon chu player ṭangkai an ni a, Everton boss Lampard chuan a bik takin Alli a fak hle.

Lampard chuan inkhel bul a la ṭantir loh Alli chungchang sawiin, "Inkhel tam lo player tan hun tlemte neih chhuna khelh phuzia lantir hi thil awlsam a ni lo a, mahse, Alli chuan a ti thei tlat a ni. Goal kan khung nana a tha thawhah ka lawm a, hei hi a tan bul ṭanna pawimawh a nih theih ka beisei," a ti.

Everton-in hnehna an chan avangin relegation zone aṭangin point liin an him a, mahse, Pathianni zanah Liverpool an lenchilh zui dawn avangin hmabak a ko hle.

Hetihlai hian Newcastle United chuan an mikhual Crystal Palace chu 1-0 in an hneh a, Miguel Almiron chuan inkhela goal awmchhun hi a khung - tlak hlauhawm dinhmunah te pawh lo ding ve hman Magpies hi table-ah 11-na an ni a, top 10-a season khar an beisei ngam tawh.