Premier League Hall of Fame Player paruk lakluh an ni leh ta

Khawvela league ngaihven hlawh ber Premier League chuan PL Hall of Fame-a dah luh tur hming paruk a puang zar leh ta a, Sergio Aguero, Didier Drogba, Vincent Kompany, Peter Schmeichel, Paul Scholes leh Ian Wright te an ni.

PL Hall of Fame-ah hian kum 1992-a league ṭan a nih hnua player ropui zualte dah luh an ni ṭhin a, nikum khan a hmasa ber atan Alan Shearer leh Thierry Henry te dah an ni a, David Beckham, Dennis Bergkamp, Eric Cantona, Steven Gerrard, Roy Keane leh Frank Lampard ten an hnung an zui.

March thla khan Manchester United legend Wayne Rooney leh Arsenal captain ropui ṭhin Patrick Vieira te dah luh an ni ve leh a, tunah player paruk hming puan a ni ve leh ta bawk a ni.

Keeper hmasa
Manchester United-in Peter Schmeichel tluka goalkeeper ropui an nei leh tawh lo - Danish keeper hi goalkeeper zinga a hmasa ber ni turin PL Hall of Fame-ah lakluh a ni.

Kum 1999-a Man United treble champion an nih theih nana player pawimawh a ni a, Denmark chu Euro 1992-ah a champion pui a, United tan league nomawi vawi nga a chawi a, Aston Villa leh Manchester City tana khel lehin Premier League-ah vawi 128 clean sheets a nei thei.

United tana Schmeichel-a khelhpui ṭhin Paul Scholes-a'n Old Trafford-ah 1993-2013 inkar kha a hun a hmang a, league-ah vawi 11 champion-in, Champions League-ah vawi hnih a champion pui bawk.

Aguero a ropui
Manchester City legend Aguero-a'n 2011-2021 chhung City tan a khel a, match 275-ah goal 184 khungin Premier League-a ram pawn mi goal khung hnem ber a ni a, league-ah vawi nga a champion pui. 2011-12 season khan QPR lakah hun tawp dawnah goal a khung a, kum 1968 hnua a vawi khat nan top flight-ah City a champion pui phah.

Kum 33 mi hian, "Ka career-a goal pawimawh ber a ni," tiin a sawi hial. Nipui transfer lai khan Aguero hian City chhuahsanin Barcelona a pan a, mahse, lung lam harsatna a neih avangin Catalan club tan match nga chiah a khel hman tihin inkhelh a chawlhsan zui.

City-a Aguero-a captain ṭhin Vincent Kompany hi defender ṭha bik a ni a, hruaitu ṭha a ni tel bawk. City tana defender ṭha bik hian league nomawi vawi li a chawi a, league match 265 khelin goal 18 a khung a, vawi 94 clean sheets a nei.

King Drogba
Chelsea striker lei fuh ber thlang dawn ila, fans tam zawkin Drogba an thlang ang. Ivorian striker ropui ṭhin hian Chelsea tan league match 254-ah goal 104 a khung a, league-ah vawi li a champion pui a, Champions League-ah vawi khat a champion pui bawk.

Arsenal player ropui sawi a nih apianga lam hmaih ni ngai lo Ian Wright-a'n Gunners tan Premier League nomawi vawi khat a chawi a, league match 213-ah goal 113 a khungsak.

Kum 58 mi Wright chuan, "Ka football zinkawngah khan professional football nih theih ka inring ngai lo. Chuvang chuan ka tan chuan fans leh ka khelhpuite nen hun hlimawm tak hmang a, he chawimawina dawn theih hi ropui tak a ni," a ti.

PL Hall of Fame-ah hian player hmingṭha zawng zawng a tel theih loh - Premier League Awards panel leh fans vote hmangin kuminah hian thlan a ni a, mahse, thlan theih tura zinga chhawpchhuah ni tur chuan a hnuaia pakhat tal hi tlin a ngai.

• Premier League-ah club pakhat tan match 200 tal khel tling tawh a ni tur a ni.
• Team of the decade emaw 20-Year anniversary team-a tel tawh a ni tur a ni.
• Premier League Golden Boot emaw Golden Glove dawng tawh a ni tur a ni.
• Premier League Player of the Season a thlan tawh a ni tur a ni.
• Premier League title vawi thum tal chawi tawh.
• Premier League-a goal 100 khung emaw keeper tan clean sheets 100 tal nei tawh.

A chunga pakhat tal hi an ti tawh a nih loh chuan Hall of Fame-ah a awm theih loh.