Ramos hoin PSG an chak

Paris St-Germain chuan tun hnai kum 10 chhunga a vawi riat nan Ligue 1 nomawi an chawi dawn, title la turin hmabak an ngah tawh lo - tun kar tawpa an chak chuan an champion ang, chak lo pawh ni se Marseille an chetsual chuan an champion tho ang.

Nilaini zan inkhelah PSG hian Angers chu 3-0 in an sawp. Neymar leh Lionel Messi tel lohna inkhelah hian PSG tan Kylian Mbappe, Sergio Ramos leh Marquinhos ten goal khat ṭheuh an khung, nuamsa takin point thum an hlawh chhuak.

Inkhel dangah Marseille chuan Nantes lakah 3-2 in hnehna an lo chang ve bawk a, hmahruaitu PSG an phak lohna chu point 15 a ni, khelh hmabak match nga chauh an nei tawh.

Tun kartawpah chuan Neymar a inlan thei leh tawh dawn, match khat hremna a hmang zo. Messi erawh hliam tenau vanga chawl a ni a, a dinhmun endik leh phawt a ni ang. Marco Verratti leh Presnel Kimpembe te pawh an chawl mek.

France - Ligue 1
Bordeaux 2 - 2 Saint-Etienne
Lorient 1 - 0 Metz
AS Monaco 1 - 0 Nice
Reims 2 - 1 Lille
Troyes 0 - 1 Clermont
Angers 0 - 3 PSG
Brest 2 - 1 Lyon
Lens 2 - 0 Montpellier
Marseille 3 - 2 Nantes
Strasbourg 2 - 1 Rennes