Arsenal mikhual tur Ronaldo leh Man United

Tum thuhmun, nihna leh boruak inang si lo - Arsenal leh Manchester United te chu vawiin tlai dar 5:00 hian Emirates Stadium-ah an intawng dawn. A chak zawk tan season thara Champions League beiseina a sang dawn, chak lo tan erawh kawng la ping lo mah se a zim tawh ang.

Chelsea hneh hlim Gunners an phur a, match thum a zawna an tlawm hnuah Blues an hneh. Man United erawh Liverpool laka mualpho hlim an
ni a, chutih rualin Cristiano Ronaldoa'n training a zawm tawh avangin an boruak a kang hret tura ngaih a ni

Ronaldo a tel dawn
Erik ten Hag boruak a lian a, manager thar an neih thu hian media a luah khat. Tuna pawimawh zawk erawh Ralf Rangnick a ni. German manager hian Premier League table-ah palina a nihpui phak loh chuan Man United manager thar tan hna a hautak zual dawn.

Rangnick-a'n Liverpool lakah a naute a rem fuh lo a, goal li zet chhuahin an khung ve miah lo. Reds lakah hian a fapa a sun vangin Ronaldo a inlan lo, Portuguese forward hian Ningani khan United training a zawm leh tawh a, vawiin tlaiah a inlan ang. Rio Ferdinand chuan, "Goal tam tak khungin team tan point a hlawh chhuak a, mahse ani chu buaina tiin an sawisel bawk si," tiin Ronaldo chungchang a sawi, tun season-a league goal 15 khungtu Ronaldo pawimawhna a hmuh hmaih lo.

Kum 37 mi Ronaldo hian season tir lama Arsenal an hneh ṭum pawhin goal hnih a khung, fapa sun hlim ni mah se Gunners tlarhnung tana ven ngun ngai bik a ni leh dawn. Rangnick-a'n Ronaldo ṭhatna turin player a rem fuh ang em, tih erawh sawi lawk theih a ni lo. Tlarhnung hi Man United buaina a ni. Norwich City lakah pawh goal thum khung mah se goal hnih an chhuah ve tho. Real Madrid defender hlui Raphael Varane a dam ṭha tawh a, captain Harry Maguire a dinpui thei a nih chuan a zia hret a rinawm.

Hale End chhuak Mikel Arteta-a'n Arsenal a ṭhuah fai mek a, player hlawh hnem leh senior a chhuahtirna hmun ruakah an academy (Hale End) chhuak ten hmun an chang, tunah chuan an naupan lai aṭanga Arsenal thinglung pu tawhte hi an innghahna an ni chho mek. Bukayo Saka leh Emile Smith Rowe te hi England tana inlan phak khawpin an inchher hriam tawh, striker Eddie Nketiah pawhin goal hnih hmangin Chelsea lakah rintlak a nihzia a lantir, tun ṭumah hian bul a ṭan lo a nih pawhin khelmualah a lut ang.

Anni pathum hi naupang deuh an nih lai aṭanga khelho tawh niin an inhrechiang. Tlarhma lamah chuan Gunners hmachhuan an ni leh ang,
rawlthar thaza rual an nih avangin Maguire leh a ṭhiante tan minute 90 chhung tlan theite hi ven uluk an ngai dawn.

Tlarhnung lam hi Arsenal buaina a ni ve tho. Ben White leh Gabriel te an chiang a, midang chu chiang an awm lo. Takehiro Tomiyasu dam tawh mah se match fi tness a la nei lo, wingback Kieran Tierney erawh a tan season a tawp tawh. Blues an hneh ṭumin Rob Holding chu a laiah awmin White chu a sirah a awm thung, Spanish manager Artetaa'n Stamford Brigde-a tlarhnung a rem anga a rem nawn a nih pawhin a mak lo
ang, hei erawh hriat a ngai - - tlarhnung hi an ṭhat lai ber a ni lo.