Willis Plaza-a'n AFC hmun himah a dah

I League relegation stage chu nimin aṭangin khelh ṭan a ni a, Aizawl FC-in season ṭantirhna match-a an hneh loh Real Kashmir chu Willis Plaza hattrick hmangin 3-2 in an hneh.

Naihati Stadium-a inkhelah Aizawl FC tan Willis Plaza-a'n minute hnihna lekah Vanlalnghenga cross chu a tlawh goal. Plaza hian minute 36-naah man of the match-a thlan Samuel Lalmuanpuia freekick aṭanga ball kal zel chu a tauh goal leh bawk.

Real Kashmir-in an player chhuanvawr Mason Robertson hmangin minute 58-na leh 60-naah siphurh an sut zo. Goal hmasa zawk hi keeper Anuj Kumar leh defender te inrinthulh vang a ni a, minute hnih hnuah Robertson hian angle zim tak aṭangin kawh zetin a khung.

AFC an hnual phah lo a, minute 69-naah F. Lalremsanga cross ṭha zet chu Plaza-a'n a tauh goal leh bawk. Mizo club hian anmahni hnaih bertu Real Kashmir an hneh avangin relegation stage khel zingah point 15 hmuin hmahruaitu an ni.

Nizan khan table mawngphaha awm Kenkre leh Sudeva Delhi te an inkhel a, result a zirin Mizo club hi match li khelh hmabak nei chungin an him thei ang.