Copa del Rey fi nal: Joaquin a hun tawp?

Zanin dar 1:30-ah Copa del Rey final khelh a ni dawn a, Real Betis leh Valencia ten champion nih an inchuh dawn - season dang angin club langsar inlan dawn lo mah se he inkhel tur hian ngaihven a hlawh a, a chhan chu Betis legend Joaquin vang a ni.

Betis fans mai ni lo, Spanish football ngainatuten an ṭan rawn Joaquín hi kum 40 mi a ni tawh a, season tharah chuan football a chawlhsawn tawh mai rinna a lian hle. Hei vang hian neutral fans tam takin Joaquín hian nomawi nen a career mangṭha se an duh a, Betis an ṭan!

Real Betis ṭantute tana Copa del Rey final tihlu zual turin fi nal hi an club innghahna khawpui Sevilleah ngei khelh a ni dawn a, nomawi chawi chung ngeia football mangṭha Joaquin pawhin a châk ang.

Zanina inhmachhawn tur Betis leh Valencia tana Copa del Rey champion lo ni tawh Joaquín hian tun season-ah match 31 khelin goal hnih a khung tawh a, assist vawi li a nei bawk - a kum aṭanga teh a rem lo.

Joaquin hian La Liga-ah match 595 a khel tawh a, Spanish La Liga-a inlan tam lamah Barcelona goalkeeper hlui Andoni Zubizarreta (621) chiah a phak tawh lo.

Manchester City boss hlui Manuel Pellegrini kaihhruaina hnuaiah Betis hian season duhawm tak an hmang mek a, La Liga lamah pawh pangana ni mekin, season thara Champions League khelh phak beiseina an la nei lian hle.

Betis hian tlarhmaah tun season-a goal 17 khung tawh Borja Iglesias, goal 10 leh assist vawi kua nei tawh Nabil Fekir leh goal 18 khung tawh Juanmi an nei a, Valencia tan fi mkhur a ṭul dawn.

Tlarhnungah Argentina centre back Germán Pezzella, Barcelona defender hlui Marc Bartra leh Arsenal aṭanga loan-a an hawh fullback Héctor Bellerín te an nei bawk.

Valencia-in Betis angin league lamah season hmang ṭha lo mah se Copa del Rey champion turin an ṭha tawk - midfi eld-ah tun season-a goal 12 leh assist panga nei tawh Carlos Soler, Spain international left back José Gayà, tun season-a goal 13 leh assist vawi ruk nei tawh Gonçalo Guedes te an nei a, Betis an hlau lo ang.