Man United lakah Arsenal an vul
Premier League-ah laipui a puak nawn awn awn a, a ri chu ring tak a ni - Arsenal ṭantute tan rimawi a nih laiin Manchetser United fans tan erawh an mittui kap chhuaktu mai a ni thung. English club lian pannih inkhelah Gunners 3-1 in an chak.
Chelsea hneh hlim Arsenal tan Nuno Tavares, Bukayo Saka leh Granit Xhaka ten goal an khung, mikhual goal neih chhun hi Cristiano Ronaldo khung niin, penalty an hmuh erawh Bruno Fernandes-a'n a hlah thung.
Mikel Arteta naute hian match 33 aṭanga point 60 hmuin palina an ni a, an elpui Tottenham chu Brentford-in goal khung loin an chelh a, Gunners hi point hnihin an san theih phah. Man United erawh point 54 nen panganaah an awm.
Maguire tel lohna
Arteta-a'n Chelsea hnehtu squad ngai deuh vek a ring a, defender Rob Holding aiah Cedric Soares a lut thung. Manchester United lama danglamna langsar tak chu captain Harry Maguire a ni, ani hi a inlan lo.
Tun hnaiah Maguire a khel ṭha tawk lo, khelmual pawn lama vauna a tawk hial. Ralf Rangnick-a'n bench lamah a dah a, tlarhnung laiah Raphael Varane leh Victor Lindelof te an inkawp, a tir aṭangin an inkawp rem lo tih erawh a lang.
Paul Pogba tan season a tawpa ngaih a ni a, midfield laiah Scott McTominay lo kirin Nemanja Matic nen an inkawp. Arsenal lamin midfield-ah Martin Odegaard, Xhaka leh Mohamed Elneny te an dah thung.
Laipui a puak
Saka-a shot chu keeper David de Gea chuan lo dang mah se a per chu Tavares-a'n minute thumna lekah goal ruakah a khung. Goal luh hma hian Varane leh Alex Telles ten an tihtur ang an ti tawk lo, an ven tur an ven loh vang a ni.
Arsenal an phur chhunzawm, keeper De Gea an en chhin zauh zauh hnuah Eddie Nketiah-a'n hnai tak aṭangin a khung belh. Mahse, VAR hmangin a offside tih a lang, amaherawhchu goal luh hmain Saka lakah an foul a, penalty an khung ta tho.
Man United tan hun harsaah Ronaldo a inlar, midfielder Matic-a cross chu defender pahnih ven karah Ronaldo hian a khung a, phurrit ṭhenkhat a la kiang. Premier League-a a goal 100-na hi a fapa boral tan a hlan.
Second half-ah United lamin si phurh sut zawh theihna hun an nei. VAR hman hnua an penalty hlawhchhuah pet turin Fernandes a rawn ding chhuak, keeper Aaron Ramsdale bum chiang viau mah se goal ban a per, penalty pettu an ngaihtuah nawnin a rinawm.
Gunners hmahruaina a nghet lo, keeper-in Telles leh Diogo Dalot te khung tur ṭha takin a dansak. Boruak san lai takin Xhaka a inlar, yard 25 zeta hla aṭangin goal ropui a khung, keeper tan tihngaihna awm lo - kha mah mah a ke vei lam lehnghal!
Beisena nung
Crystal Palace, Brighton leh Southampton an hneh loh zawn kha chuan Arsenal tan UCL beiseina a thamral tluka ngaih a ni. Mahse, an elpui an chesual ve tho a, tunah chuan an kuta awm a ni leh ta. West Ham (A), Leeds United (H), Tottenham Hotspur (A), Newcastle United (A) leh Everton (H) te an la tum leh dawn.
Tlarhnunga an buaina a la reh chuang lo, Man United lakah goal khat chauh chhuah mah se an tlarhnung a nghing nasa. Mahse, hun tawp dawnah Takehiro Tomiyasu a inlan thei tawh. Japanese defender hian an buaina pakhat chu a chingfel thei ang.
Forward pawimawh Saka erawh hliam vanga lak chhuah a ngai thung. England international hi 100%-a dam chiang lo chungin a inlan a, a dinhmun tak erawh hriat a la ni lo, a chawlh a ngai a nih chuan North London club tan chânna lian a ni dawn.
Arsenal manager Arteta chuan, "Boruak a inthlak thut thut a, chuvangin palina dinhmun a chiang tia sawi theih a la ni lo. Chutih rualin kan tan kawng a inhawng tih erawh ka hre chiang, kan inkar a zim em avangin fimkhur taka kan awm a ngai," tiin a la ṭawng fimkhur hle.
Buaina a zual
Ole Gunnar Solskjaer an ban a, hei hi buaina chinfelna a ni lo. Ralf Rangnick an la a, ani pawhin buaina a chingfel chuang lo - a punlun ting emawni tih mai tur a ni. Liverpool laka tlawm hnua Arsenal hneh loh zui hi mualphona nasa a tling.
Reds an hneh loh boruakah manager thar atan Erik ten Hag an lak thu an puang a, hei hian eng angin nge nghawng a neih dawn hriat la ni lo mah se, an match khelhah erawh player an phur thar sawt lem lo tih chu a takin a hmuh theih.
Pasarihna West Ham nen an inkarah point hnih chauh a awm. United hian an match lehpekah Chelsea (H) an tum leh nghal dawn, chumi hnuah Brentford (H), Brighton (A) leh Crystal Palace (A) te an tum leh ang, tuna an boruak en chuan huphurhawm tak vek an ni.
Man United manager lailawk Rangnick chuan, "Hma kan sawn, mahse result erawh a chhia. Goal khung theihna remchang kan insiam ṭeuh chunga kan tihlawhtling thei lo kha a pawi," a ti. Maguire inlan loh chhan chu tlarhnunga pali a tlar duh vang leh, a tan hun harsa a nih vang tih a sawi bawk.
Tottenham an chelh
Arsenal an chak tih hresain Tottenham Hotspur an inlan, an tan point thum hmuh a pawimawh. Mahse, Antonio Conte naute hian Christian Eriksen awmna Brentford an hmachhawn a, goal an khung thei lo; kai thar nen hian 0-0 in an inhnehtawk.
Inrinni zan London chhim lama Premier League inkhelah Eriksen chu mipui mit fukna a ni. Denmark midfielder hian harsatna lian tak a tawh hnuah Spurs an hmachhawn lehna hmasa ber a ni a, inkhelh ṭan hma aṭangin fans lamin an lo lawm hle.
Eriksen hi Bees goal nawrna bulpui a ni, a bik takin set piece a pet aṭangin a hlauhawm thei hle. Corner a pet chu Ivan Toney-a'n a tauh lut teuh thei hle, ṭum hnih chu uiawm takin goal pawnah a kal, Pontus Jansson-a tauh pawh goalline aṭangin Harry Kane-a'n a lo dang hram.
England captain Kane pawhin second half-ah remchang chu a hmu, tawih zeta a bin chu Bees keeper David Raya tan dan theih loh ni mah se goal pawnah chiah a kal a, an duh leh mamawh zat point an hlawh chhuak thei bik lo.
Brentford hian point 40 hmuin table-ah 11-na an ni, season tharah EPL an khelh chhunzawm ang. Spurs hi panganaah an awm, palina ni phak turin kawng a la inhawng, mahse Liverpool leh Arsenal an la hmachhawn dawn, a awlsam lo ang.