U21 Inter Veng champion Mission Veng

Willow Enterprise Mizoram Inter Veng Under 21 LC/VC Basketball Tournament 2022-ah Mission Veng an champion.

Mission Veng hian champion turin Zirtawpni zan khan Hawla Indoor Stadium-ah Ramhlun Vengthar chu 83 - 66 in an hneh. Champion-na kawngah K. Lalthianghlima'n 243 point zet a score a, final-ah pawh Thianga hi player langsar niin Most Valuable Player-ah thlan a ni.

Inelnaah hian team 56 an tel a, Mission Veng hian nomawi chawi turin Upper Republic (77 - 64), Nursery (72-71), Khatla South (94- 90), Tuikual South (88 - 85) leh Ramhlun Vengthar (83-66) te an hneh.

Mission Veng coach H. Lalhruaitluanga chuan, "Kan team inlungrualna a ṭha hle. Court chhunga player inlan leh bench-a awmte rilru pum khatin an awm a, chak duhin an tui hal vek. Veng mipuiin min ṭawmawm ṭha a, kan ṭanrualna rah kan seng. Min ṭawiawmtu leh min sponsor-tute chungah lawmthu kan sawi takzet a ni," tiin Vanglaini a hrilh.

Inter Veng Under 21 inelna hi Mizoram Basketball Association (MBBA) hriatpuia Mizoram Basketball Referee (M. RIV) buatsaih a ni a, entu mipui an ṭhahnem ṭhin hle.