Fury-a'n Whyte a tudawl - chawlh a tum!

Nimin zing khan Tyson Fury chuan round ruknaah Dillian Whyte chu technical knockout hmangin a hneh a, WBC heavyweight title a kawl lai chu a humhim leh ta.

Fury hian hnehna a chan hnu lawkah boxing a chawlhsan tur thu a puang zui a, British boxer hian, "Gypsy King tan hei hi puan zar kharna tur a ni tawh ang," a ti a, ennawm min chhawpsak a tum tawh lo.

Kum 33 mi Tyson Fury hian tun hmain chawlh a lo puang tawh tih erawh hriat tel a ṭha a, a hunlaiin thutak viau mah se British boxer hi a chawl hlen lo a nih pawhin thil mak tia sawi tur a ni lo ang.

Fury hian vawi 33 inhnek a hmachhawn tawhah tlawm a la nei lo a, Deontay Wilder nen vawi khat an inhnehtawk tih loh chu hnehna hlado chham chungin ring a chhuahsan vek.

Inhnek chu
Whyte-a'n a kut veilam hmanga a hnek na tak chu a uanpui ṭhin a ni a, boxer pahnih intawn hmain Fury-a'n Whyte-a thiamna chu dah nil turin a kut veilam a hman nasat tur thu a sawi.

Wembley Stadium-a mipui 94,000 hmaah boxer rothap pahnih an intawng ta ngei a, Fury-a'n thluak game a vawrh vir a, second round aṭangin a kut ding lam a rawn hmang tam a, Whyte a talbuai.

Fury-a'n round thumnaah ṭha zetin Whyte a hnek fuh a, a vawi khat nana world title lak tum Whyte hian beih let tum mah se Fury-a'n boxer pasang zawk a nihna a chhawr ṭangkai a, a khingpui a che hleithei lo.

British boxer pahnih inhnek boruak a 'hot' a, fourth round-ah phei chuan break dawnah Whyte-a'n Fury a la hnek luih avangin Fury thin a rim a, inhnek a hmuhnawm takzet.

Fury a ropui
Round ruknaah Fury-a'n thil ropui a thlentir - a kut vei lam hmangin Whyte a chhaih a, Whyte a rawn tawlh hnai lai tak chu Fury hian uppercut hmangin mawi em emin a lo hnek.

Whyte a tlu a, boxer huaisen zia chhuahin a tho leh. Mahse, a ding nghet tawh lo tih a lang a, referee tan inhnek zui tir chi a nih loh avangin Fury a chak.

6ft 9in a sang Fury hian inhnek vawi 33 a hmachhawnah vawi 32 hnehna a channa a ni a, vawi khat chu draw result a nei - a hneh zingah 23 hi a knockout.Fury chuan, "Dillian hi mi huaisen a ni a, world champion a la nih ka beisei.

"Boxer ropui ber zinga mi a ni a, vanduaithlak takin zaninah chuan min tawn a ngai si a ni. Boxer satliah a tawng lo a, he khawvela ṭha ber hi min tawng tlat a ni," a ti - Whyte hian vawi 31 fight a hmachhawnah vawi 28 hnehna a chang a, vawi thum a tlawmna a ni.

Mangṭha boxing?
Fury-a'n inhnek a chawlhsan tur thu a sawi a, rin dan thiam a harsa! Fury chuan, "He zin kawngah hian hun ka hmang rei tawk ve ta a, ka duh ang apiang chu ka tihlawhtling tawh.

"Rocky Marciano hnua heavyweight boxing-a tlawm nei loa chawl awmchhun ka ni dawn a, boxing khawvelah hi chuan min hneh thei an awm lo a ni," tiin a sawi a, a ṭawng pawr hle.

Fury chuan sawi zawmin, "Ka nupui hnenah Wilder nena kan inhnek zawha ka chawlh tur thu ka tiam a, mahse, Wembley-a inhnek tura sawm ka ni a, fan-te lakah pawh ka bain ka hria - chawlh dan duhawm tak a ni," a ti.

Manchester khaw chhuak Fury hian November 2015 khan Wladimir Klitschko hnehin WBA (Super), IBF, WBO leh IBO title a hnek chhuak a, mahse, rilru buaina leh harsatna avangin a title a kalsan.

Beiseina
Fury hian a title a kalsan aṭanga kum hnih leh a chanve hnuah ring chhung a rap leh a, a thiam a lo la theihnghilh lo - vawi hnih a chak leh hnuah Wilder a hmachhawn a, an in draw.

Wilder nen an inhnehtawk hnuah Tom Schwarz leh Otto Wallin a hneh a, Wilder nen vawi hnih intawng lehin a hneh ve ve a, WBC title a hlawh chhuak - Whyte lakah a humhim leh ta.

Fury-a nupui Paris chuan, "A ṭhatzia pholang turin tih leh tur chuang a nei tawh lo a, a chawlh a hun tawh a ni. Tih tur la nei ni se, 'Tyson, ti leh rawh,' ka ti ngei ang. Mahse, engmah tih a mamawh tawh lo - a lo kir dawn a nih chuan unification fight atan chauh a ni ang," a ti.

Anthony Joshua chu tun nipuiah WBA, IBF leh WBO champion Oleksandr Usyk nen rematch an neih ngei a rinawm a, he inhneka chak zawk a hmachhawn thei dawn a nih chuan Tyson hian glove bun leh a hrehin a rinawm loh.