Dan rual 10h Bayern Munich
Bayern Munich chu a zawna a vawi 10 nan Bundesliga-ah an champion a, Europe league sang pangaa mahni league sang bera a zawna vawi 10 champion thei hmasa ber an ni. Bavarians tan Bundesliga champion hi thil thar a ni tawh lo a, manager Julian Nagelsmann-a tan erawh a nomawi hmasa ber a nih bakah an hmelma Borussia Dortmund hneha champion an nemngheh avangin a hlu sawt ang.
Inrinni zan khan Allianz Arena-ah Bayern-in anmahni hnaih bertu Borussia Dortmund an mikhual a, hnehna an chang a nih chuan match thum khelh tur la awm chungin an champion thei tih an hria. Bavarians-in Serge Gnabry leh Robert Lewandowski te hmangin first half-ah an khung a, Emre Can penalty hmangin second half-ah Dortmund-in siphurh sut ṭhen mah se Jamal Musiala-a'n hun tawp dawnah chak nemnghehna goal a khung.
Der Klassiker chu
Bayern leh Dortmund inkhel hi Der Klassiker tih a ni a, 'German Clásico' tihna a ni. Germany-ah chuan club pahnih inkhel hian ngaihven a hlawh a, tun ṭum inkhel hian champion tur a hril avangin a hlu lehzual.
Mualneitu tan Gnabry chuan minute 15-naah kawh zetin a volley goal a, mualneitu thawm a ṭha. Dortmund-in kum 2014 hnuah Bayern an hneh tawh lo a, chutihrualin Bavarians laka match ruka goal nga khungtu Erling Haaland an kawl avangin beiseina an neih phah.
Amaherawhchu Haaland hian chance neih ṭhat a hlah a, Lewandowski erawhin minute 34-naah 'cool' zetin a khung. Halftime-ah Marco Rose-a'n a naute a fuih ṭha a, second half-ah bul an ṭan ṭha zawk. Joshua Kimmich-a'n Marco Reus lakah penalty a chawi a, minute 52-naah Emre Can-a'n goal-ah a chantir avangin inkhel a nung sawt.
A tawpah erawh team lian zawk Bayern bawk an chungnung a, minute 83-naah Jamal Musiala-a'n box chhungah rilru fim takin goal ṭha tak a khung. Champion phu leh chak phu zawk Bayern-in 3-1 in hnehna an chang.
Nagelsmann a lawm
Bayern manager Julian Nagels-mann chuan, "Season awlsam a ni lo. Chhuanlam siam ka tum lo a, chutihrualin thil tam tak a thleng a, hun harsa kan paltlang. Nomawi lian tham ber a nih avangin ka tan a hlu a, chutihrualin vawi 10 champion tawh pawh a hlu tho a ni," tiin a sawi.
Kum 34 mi Nagelsmann hi Bundesliga champion thei manager naupang ber dawttu a ni a, Matthias Sammer chiah a tluk lo. Sammer hian kum 33 mi a nihin kum 2002 khan Borussia Dortmund a champion pui.
Champion kan nih chhan kan lantir a, kan champion-na hrang hrang hi a dang vek. Ṭha taka khelh reng hi a har a, football ṭha tak kan khel a ni. Engtik hunah emaw ni chuan a zawna vawi 10 champion hlutzia hi an hre lehzual ang. Germany chauh ni loin Europe khawlmualpui tawp thlirin kan thil tawn hi a hlu a, chanchin danglam tak a ni. - Robert Lewandowski, Bayern striker
Champion reng hi a ropui a, kan ngai hlu hle. Pawn lam mi chuan ngaiah an nei mai ang a, mah se hlawhtlinna chang tur hian thawhrim a ṭul a ni. - Joshua Kimmich, Bayern midfielder
Kan lawm takzet. Kan kut ngeiin nomawi tak tak vuan ila a nuam lehzual ang. Muller nen a vawi 10 nan a zawnin kan champion a, a ropui danglam hle a ni. Inkhel entu kha 75,000 a ni a, kan hna zawh ngei kha kan duh. - Manuel Neuer, Bayern captain
Mahni mual ngeia elpui ber hneha champion hi thil thleng zen zen a ni lo. Chuvangin champion ngei kha kan duh a, pressure pawh kan pal dai. Squad ṭha tak kan nei a, player ṭha tak nei mah ila champion tur chuan thawhchhuah a ngai. Bundesliga champion aia nuam a awm chuang lo a, fan-te nen zan duhawm tak kan hmang ang. - Thomas Müller, Bayern forward