Man City tan Jesus a inlar

Manchester City-in Premier League champion nomawi humhim ngei an tum tih lantir nan Inrinni zan khan Watford 5-1 in an sawp. Etihad Stadium-a inkhelah hian Gabriel Jesus-a'n goal li a khung a, Rodri-a'n goal khat a khung bawk.

Pep Guardiola hoten point khat chauhin Liverpool an pha lo tih an hria a, Watford lakah attacking football khelin an hmuhnawm nghal hle.

Minute lina lekah Oleksandr Zinchenko cross chu Jesus-a'n a tlawh goal nghal. City goal bawh a na chhunzawm a, Kevin de Bruyne cross duhthusam chu Jesus-a'n a tauh goal.

Man City tlarhnungah Ruben Dias leh Aymeric Laporte te an inkawp chungin Watford lakah a phui tawk lo a, minute 28-naah Emmanuel Dennis ball pek chu Hassane Kamara-a'n chiang zetin a pet lut.

Watford-in point hmuh beiseina an nei rei lo, minute 34-naah kawh zetin Rodri-a'n kawh zetin a pet goal. Man City-in halftime-ah 3-1 hma an hruai avangin chak tur a chiang.

Second half-ah Jesus-a'n a penalty hlawhchhuah goal-ah a chantir a, minute 49-naah hattrick a siam. Brazilian forward hian minute 54-naah De Bruyne siam chu a pet goal leh a, Man City 5-1 in an chak.

Man City leh Liverpool inthlauhna hi a tam loh avangin goal difference a la pawimawh thei a, Watford lakah Pep Guardiola nauten goal nga zet khung mah se Reds goal difference a la ṭha zawk. Nizan khan Merseyside derby-ah Jurgen Klopp-a hoten Everton an hmachhawn a, result hian champion tur a hril theih bakah relegate tur a hril thei bawk.