Messi hoin PSG an champion
Lionel Messi-a goal mawi leh ropui chu Paris Saint Germain champion nan a tawk. PSG chuan a vawi 10 nan Ligue 1 title an la a, champion hnem ber Marseille record an nih rual ta chiah.
Inrinni zan Le Parc des Princes-a inkhelah PSG tan point khat a tawk, an mamawh ang zat point chu an hmu. Lens nen 1-1 in an inhnehtawk a, khelh hmabak pali la awm mah se pahnihna Marseille tan Mauricio Pochettino naute umphak theih an ni tawh lo.
Fans an lawm lo
Poch-a enkawl PSG hian goal khung an harsat, mikhual defender Kevin Danso chu minute 57-naah hnawhchhuah a ni a, a hnuah goal an khung thei chauh, an goal erawh sawisel boa mawi leh nalh a ni thung.
Neymar-a ball pek dawngtu Messi chuan box pawn aṭangin a pet kum lut pawp a, keeper Jean-Louis Leca tan dan theih a ni lo. Hun tawp dawnah erawh Lens lamin Corentin Jean hmangin an sut.
Ligue 1 champion ni mah se fans lawm a kim lo. Real Madrid hneh loa Champions League aṭanga an tlakna an pawm thei lo a, inkhel tawp hma minute 15 la awmah khelmual an chhuahsan dum dum, inkhelh ban hnu minute 10-ah an chhuak kim!
PSG captain Marquinhos chuan, "Thil zahthlak tak a ni, football hi kan nun leh eizawnna a ni a, kan zah tur pawh a ni. Fans tel loa champion lawm chu thil zahthlak a ni," a ti a, midfielder Marco Verratti pawhin a hriatthiam loh thu a sawi ve bawk.
Poch tan nomawi
Pochettino hian hun rei tak chhung Tottenham a enkawl tawh a, league nomawi erawh a la chawi ngai lo. Tunah chuan Argentine manager hian league title a la ve ta a, fans lam duhthusam thlentir lo mah se a tan mellung pawimah a ni tho.
Season hmasa khan PSG hian Lille an tluk lo, tunah erawh an hnuaia awm Marseille aiin point 16 zetin an sang fal thei. An khelmual bika league match 17 an khelhah chak loh an nei lo a, vawi 15 zet hnehna an chang thei a ni.
Pochettino chuan, "Hun harsa kan paltlang a ngai, engtik niah emaw chuan a ṭha leh mai ang. Mipui lalna hmuna awm kan nih avangin an lungawi lohna an lantir hi a mak lo, chutihrualin Ligue 1 nomawi hi kan zah tur a ni," tiin a sawi a, a hma hun erawh a sawi chiang rih lo.
PSG-in an duh ber chu UCL nomawi a ni a, mahse chuti ngawta lak theih a ni si lo. Poch hma pawh hian manager hrang hrang an lo ruai tawh, club chairman Nasser Al-Khelaifi-a'n season thara atana an hmalak dan tur chu a la sawi chiang tura ngaih a ni.