Thawnthu ngaihnawm ziaktu Real Betis
A tawpah a changtupa chu hlim takin a nui a, a chhehvel mipuite chuan a hlimna chu hriatthiampui takin an lo thlir a; chu hlimna chu thua sawifiah chi a ni lo a, hlaa sak fiah theih pawh a ni chuang lo.
Kum 40 mi Joaquin Sanchez hmelah chuan hlimna a zam vel a, khawvel hian a dem thiang lo - a hmangaih em em Real Betis tan Copa del Rey nomawi a chawi miau alawm!
Inrinni zan khan Spanish Cup final-ah Real Betis leh Valencia an intawng a, hun pangngaiah 1-1 a an inhnehtawk hnuin penalty hmanga chak zawk zawn a ni - Valencia tan Yunus Musah chuan a pet goal lo a, 5-4 in Real Betis an chak.
Betis tan hian Borja Iglesias chuan minute 11-na lekah goal hmahruai a khung a, mahse, Valencia-in Huro Duro hmangin an chhanglet - minute 120 chhunga goal dang a luh loh avangin penalty hmangin final chinfel a ni a, Betis an vannei ta zawk.
1-1
Seville khawpuia Estadio de La Cartuja stadium-ah fans 53,387 an pungkhawm a, khawtual club Real Betis-in Copa del Rey final an khelh avangin Valencia aiin ṭantu an ngah zawk.
Fan-te lawmna thlen turin Betis-in minute 11-naah goal hmahruai an khung a, Arsenal aṭanga Betis-a loan-a khel Hector Bellerin chuan Borja Iglesias tan a siamsak a, season duhawm tak hmangtu Iglesias hian hnai set sawtah a tauh lut.
Mahse, Valencia an beidawng duh bik lo - minute 30-na lekah si phurh sutna goal an hlawh chhuak nghal a, Ilaix Moriba siamsak chu Huro Duro chuan um lutin Manchester City keeper hlui Claudio Bravo a 'chip' khum a, a goal.
Betis hian goal dang khungna remchang nei mah se Sergio Canales leh Juanmi ten post an tihper ve ve a, Nabil Fekir leh Iglesias chance neih pawh Valencia keeper Giorgi Mamardashvili-a'n a hming chher nan a hmang.
Penalty chu
Minute 90 chhunga goal dang a luh loh avangin extra time khelh a ni a, goal dang a la luh loh cheu avangin penalty hmanga chak zawk zawn a ṭul. Betis tana pettu ten an pet goal vek laiin Valencia tan kum 19 mi, USA international Musah chuan a khung ve thei tlat lo.
Penalty-ah 5-4 in Real Betis an chak a, an club chanchin a vawi li nan nomawi an chawi - Seville khaw club hian 1934-35 khan La Liga nomawi an lo chawi tawh a, Copa del Rey-ah hian 1977 leh 2005 khan an champion bawk.
Manuel Pellegrini hoin an nomawi palina an chawi a, Betis tan chuan tun season hi chhinchhiah tlak a ni - season thara European football khelh an beisei mek bawk a, La Liga table-ah pangana an ni mek.
Palina Atletico Madrid chu point li chauhin an thlau a, match nga khelh tur a la awm. Manchester City boss hlui Pellegrini-a'n fak a phu a, season hmasa ṭan dawna a zawm club-a a hnathawh hi a ropui hle - City tan 2015-16 League Cup champion a nih hnua nomawi a chawi lehna hmasa ber a ni.
A hming Joaquín
Betis tan captain Joaquin chu minute 86-naah luhtir a ni a, kum 40 mi forward hian penalty-ah a club tan goal a khung - nomawi nen ngei inkhelh a chawlhsan dawn ta niin a lang.
Joaquin hian kum 2005 khan Betis tan hian Copa del Rey nomawi a lo chawi tawh a, nomawi chawi loa season tam tak an hman ral hnua nomawi chawitu zingah a tel leh ta.
Betis aṭanga inzir chhuak Joaquin hian kum 40 a tling tawh chungin tun season-ah match 32 a la khel a, goal hnih khungin assist vawi li a nei - nikum November khan tun season hi footballer anga a season hnuhnung ber tur a nih thu a lo sawi tawh.
Spain tan vawi 51 inlana goal li khungtu Joaquin chuan, "Copa del Rey-a champion leh hi kan duh ber chu a ni," a ti a, a sawi anga inkhelh a chawlhsan zui a nih pawhin nomawi nen ngei a hmangaih club a mangṭha thei dawn.
Copa del Rey - Final
Real Betis 1 - 1 Valencia
REB: Borja Iglesias 11'
VAL: Huro Duro 30'
*Penalty-ah 5-4 in Real Betis an chak.
Penalty pet dan
Real Betis
Willian José Goal
Joaquín Goal
Andrés Guardado Goal
Cristian Tello Goal
Juan Miranda Goal
Valencia
Carlos Soler Goal
Uroš Racic Goal
Gonçalo Guedes Goal
Yunus Musah X
José Gayà Goal