Mumbai City an tla

AFC Champions League-ah Mumbai City tan beisei tur a awm tawh lo - Zirtawpni zan khan Al-Shabab chuan 6-0 ngawtin Mumbai City hi an hneh a, Indian Super League club tan beisei tur a awm tawh lo.

Saudi club ṭha Al-Shabab tan Hattan Bahebri chuan hattrick a siam a, Abdullah Al-Joui leh Carlos Junior te chuan goal khat ve ve an khung bawk a, Mumbai captain Mourtada Fall chuan an lamah a ti lut bawk.

Mumbai tan ṭum dang ang bawkin Lallianzuala Chhangte leh Lalengmawia Ralte ten minute 90 an khel tluan a, Apuia hian goal khungna remchang nei mah se goal-ah a chantir thei lo.

Indian club hian Al-Shabab hi group stage hmasa berah an lo tawng tawh a, 3-0 in an ngam lo. Mumbai hian Champions League-a Indian club chak hmasa ber ni turin Air Force Sports Club chu 2-1 in an hneh zui a, an phur hle.

Mahse, Al-Jazira nen vawi hnih intawng zuiin, point khat chiah an hlawh chhuak a, Al-Shabab lakah an tlawm leh ta bawk - match nga aṭangin point li an nei a, match khat khelh tur la nei mah se an tlang thei tawh lo.

Mumbai hian an match hnuhnung berah Air Force SC an tum dawn a, hneh pawh ni se west region-a pahnihna ti ṭha pathum zinga an tel phak tawh dawn loh avangin an tla chiang tawh - Al-Shabab erawh last 16 an lut thung.