Ajax-in champion an hnaih

Erik Ten Hag-a enkawl Ajax chuan Inrinni zan khan Goffertstadion-ah mual neitu NEC chu minute 88-naa Brian Brobbey-a goal hmangin 1-0 in an hneh.

Eredivisie-ah match li chauh khelh tur a awm tawh a, Ajax hi point liin hma an la hruai mek avangin champion an hnaih zel. Manchester United-in season zawh aṭangin manager Ten Hag hi an lakluh dawn avangin Ajax chanchinin ngaihven a hlawh phah.

NEC an hneh zawhah Ten Hag hi Manchester United-in Arsenal an hneh loh chungchang an zawt. Ajax manager chuan, "Sawi tur ka nei lo. A chhan chu Man United-a awm mekte chungah zahna ka lantir a ngai. Ka sawi tawh ṭhin angin Ajax-ah mawhphurna ka chelh a, Ajax chungchang zawhna chauh ka chhang ang," tiin inkhelh banah a sawi.