Record thar hmuh tur a awm lo ; Tottenham 2-0 Chelsea

Chelsea-in Premier League-a chak zawn rei ber record siam tumin White Hart Lane tlawh mah se Tottenham Hotspurs-in an beiseina an ti tlawlh. Nilaini zan inkhelah Dele Alli goal hnih hmangin Spurs-in Antonio Conte hote 2-0 in an hneh.

Tottenham-in point thum an hmuh rual chiaha lang nghal chu Chelsea an chak lo ve thei tih a ni a, point 10 laia league hmahruaitu Blues pha lotu Manchester United pawh paruknaah daih awm mah se champion thei zinga chhiar tel ngam an ni. Italian manager Conte hoten point 49 an hmu a, anmahni hnaih bertu Liverpool nen point nga bakin an intlau lo - an hnuai leh hreta awm Spurs (42), Manchester City (42) leh Arsenal (41) te hi season hnuhnung lama Reds tluk lo vek an ni bawk.

Danglamna Alli
Chelsea midfielder hlui Frank Lampard hnuah England-in goal khung thei midfielder an nei leh ta niin a lang - a hming chu Dele Alli a ni.

Spurs midfielder Alli hi feet ruk leh inches hniha sang a ni a, Blues lamah a lu hmangin goal hnih a khung. Kum 20 leka upa Alli hian match hnuhnung pathumah goal hnih vek a khung a, league match hnuhnung paliah goal khung vekin tun season-ah goal riat a khung tawh.

Season liam ta ṭantirh aṭang­a chhutin Alli hian goal 12 a khung tawh a, English midfielder chunga awm chu Sergio Aguero leh Harry Kane (35 Goals); Romelu Lukaku leh Jamie Vardy (29); Jermain Defoe, Diego Costa leh Alexis Sanchez (26); Olivier Giroud (22) te niin forward langsar tak vek an ni.

Season bul ṭan ṭha tawk lo Alli hian MK Dons aṭangin kum 2015 khan Spurs a zawm a, a man chu pound maktaduai nga leka tlawm a ni. Pochettino-a'n inkhelh hmain tun hnaia English football-a player pawimawh ber a ni tiin a sawi a, inkhelh banah Argentine manager thusawi dikna a lang bawk.

Pochettino thluak
Chelsea an chak zawn rei tawh a, Spurs hi a zawna vawi li chak tawh tho an ni. Mauricio Pochettino-a'n Blues manager Conte ang thoin Hugo Lloris hmaah defender pathum a rem a, mual sir lama awm Danny Rose leh Kyle Walker ten tlarhma lam an pui ṭha bawk.

Alli goal hnih khung hi Christian Eriksen ball vawrh ṭha bik aṭanga lut ve ve a ni a, Belgian midfielder ball petu hi right wing back Walker-a ball pass ve ve a ni. Khelmual chhunga player ṭangkai erawh defensive midfielder Victor Wanyama a ni a, Kenyan mid­fielder zarah Mousa Dembele, Eriksen leh Alli ten Harry Kane an thlawp theih phah.

Hei chauh hi a la ni lo, Argen­­tine manager hian player naupang a ring ngam bawk. Alli hi chu England tana European Championship khel tawh a ni kan tih pawhin Pochettino hian tawnhriat nei ṭha Moussa Sissoko a neih reng laiin Dembele thlak turin minute 74-naah kum 20-a upa Harry Winks a luhtir ngam. French midfielder Sissoko erawh hun tawp hma hretin Alli thlak nan a hmang thung.

Blues an ral lo
Chelsea hian point an hlawh chhuak lo a, league bikah erawh nikum September 24-a Arsenal an hneh loh hnuah point thum an hlawhchhuah lohna hmasa ber a ni chauh. Antonio Conte hote hi an khel ṭha lo pawh a ni chuang lo a, Spurs khelh ṭhat zan an tawng mai a ni.

Blues tan player pawimawm Eden Hazard-a'n chance ṭha vawi hnih a hlah a, Belgian midfielder hian goal hmahruai khung ngat se result danglam thei a ni. Kar tawp lama FA Cup khelh zawhah Chelsea hian champion lai Leicester City an tlawh dawn a, tla thei dinhmuna ding Hull City an hmachhawn chhunzawm dawn. Antonio Conte hote hian Tigers zawhah Liverpool leh Arsenal an hmachhawn dawn a, match hnih result hian season tawp thlengin nghawng a nei thei ang.

Eng nge an sawi?
Chelsea manager Antonio Conte chuan, "Tottenham hma­chhawn hi a awlsam lo a, inkhelah pawh kan intluk tawk hle a ni. Tlarhnung kan rem phui ṭhat laia goal kan chhuah kha a pawi takzet a, hun pawimawh laia goal kan chhuah kha a pawina belhchhahtu chu a ni. First half tawp leh second half tirah goal kan chhuah a, goal khungna chance kan hlah hnua goal khung an ni. Amaherawhchu football-ah chuan engpawh a thleng thei a, season tawp thlenga hmahruaitu dinhmun hauh turin kan thawhrim zel a ṭul a ni," tiin chak lo mah se an khelh chhiat loh thu a sawi.

Tottenham boss Mauricio Pochettino chuan, "Hmahruaitu nena kan inthlauhna point thumin kan ti tlem a, inkhel pawimawh bikah kan chak a ni. Europe-a team ṭha ber zinga mi kan hneh thei a, kan chak hi a hlu a ni. Ka naute rilru put hmang ka chhuang a, nomawi beisei turin kan huai tawk bawk. Football-ah chuan beiseina neih a pawimawh a, thil lian tam kan beisei ngam tih kan lantir," tiin Blues an hneh avanga a lawm thu a sawi.