Didika'n Aizawl FC a hmachhawn dawn lo
Indian Super League hnuhnung bera Atletico de Kolkata champion puitu, midfielder Lalrindika Ralte chu tun season I League match hmasa bera Aizawl FC an hmachhawn hunah East Bengal tan a inlan thei dawn lo.
Lunglei tlangval Didika chuan, "Squad-ah ka awm lo ang, coach Trevor Morgan nen kan inbiaa ka ṭhal (groin) a la dam chian loh avangin match hmasa ber bik hi ka awl ang. Kolkata Derby-a Mohun Bagan nena kan inkhelh hun aṭanga inlan ṭan ka duh zawk," tiin Vanglaini palai a hrilh a, Aizawl FC tan chuan thu hriat nuam tak a ni ngei ang.
East Bengal midfielder Didika chuan, "Tupawh khel se champion kan tum a nih chuan kan chak ngei ngei a ṭul. Chutih,rualin Aizawl FC pawh coach thar hnuaia khel tur an ni a, ṭha taka khel a, season ṭha tak hmang turin duhsakna ka hlan," a ti.
I League awm hnuah Kolkata club lian East Bengal hi an la champion lo a, tun season hi a tawpna tura ngaih a nih tawh avangin champion ngei an tum. Amaherawhchu season liam taa an South Korean forward Do Dong-hyun an chhuah hnuah Asian player an lalut lo a, foreigner pathum zingah Haiti midfielder Wedson Anselme chiahin training a la zawm bawk.
January 6, Inrinni tlaia Aizawl FC an hmachhawn hmain Ugandan defender Ivan Bukenya awm hman pawh nise training mumal a nei hman dawn lo a, Trinidadian forward Willis Plaza erawh a inlan hman lo hrim hrim ang.
East Bengal-ah Mizo pathum Didika, Aizawl FC captain hlui David Lalrinmuana leh Robert Lalthlamuana te an awm. Khawzawl tlangval Robert pawh hi inhliam vangin a dinhmun a chiang lo.
I League - Round 1 Fixtures
January 7, Inrinni
4:30 PM East Bengal Vs Aizawl FC
7:00 PM Bengaluru FC Vs Shillong Lajong
January 8, Pathianni
4:30 PM Chennai City Vs Minerva Punjab
7:00 PM Mumbai FC Vs DSK Shivajians
7:00 PM Mohun Bagan Vs Churchill Brothers