India captain atangin Dhoni a bang

January 15-a England nena ODI series khel tura India a inbuatsaih mek laiin beisei loh lam aṭangin chanchin thar a awm a, chu chu one day international leh Twenty20 a India captain a nihna aṭanga Mahendra Singh Dhoni ban thu hi a ni. MS Dhoni hian a captain nihna bansan mah se India tan erawh a khelh chhunzawm zel ang.

Kum 35-a upa Dhoni hian September 2007 aṭang khan India cricket team captain dinhmun hi a chelh ṭan a, a kaihhruaina hnuaiah India chu 2007 World Twenty20, 2011 World Cup leh 2013 Champions Trophy-ah te nomawi chawipuiin Indian cricket chanchina captain ropui ber ang hiala sawi a ni.

Board of Control for Cricket in India (BCCI) chief executive Rahul Johri chuan, "India cricket team chuan a kaihhruaina hnuaiah bung thar kan kai a, a hnathawh leh sulhnu ropui tak hi Indian cricket chanchinah hriatreng a ni tawh ang," tiin India fapa chuam chu a thlah.

Sulhnu chhuan tlak

Dhoni hian ODI match 199-ah India kaihruaiin T20 international match 72-ah captain nichungin a khel a, kum 2008 leh 2014 inkarah khan Test match 60-ah captain a ni bawk. Jharkhand tlangval hian a vaia belhkhawmin match 331-ah India a kaihruai a, international match-a heti zat captain nichunga inlan thei hmasa ber leh awmchhun a ni.

Kum 2007 a T20 World Cup hmasa ber South Africa a khelh a nih ṭumin captain tura ruat a ni a, final-a wicket ngaa India-in a hmelma kumhlun Pakistan an hneh zui bawk avangin cricket atchilhna rama Dhoni lar dan chu pui tak a ni. Kum 35-a upa middle order batsman hi target sang tak hnuaiah pawh a zam ngai loh avangin fak a hlawh a, 'Captain Cool' tia hminglem pek a ni hial.

ICC World Cup 2011 final-a India leh Sri Lanka an inhma­chhawn ṭumin Dhoni hian ball 79 a hmachhawnah run 91 vaw chhuakin a 'six run' vuak chhuah chu India tan World Cup nomawi hlawh chhuahna a ni. Dhoni-a'n a la duhtawk mai lo. Kum 2013 Champions Trophy final-a England nen an inhmachhawn ṭumin India chu a champion pui leh a, kum 2014 T20 World Cup final-ah erawh Sri Lanka an ngam lo thung.

Dhoni hian ODI match 199 India a kaihhruaiah vawi 110 hnehna chanpuiin vawi 74 an tlawm a, run 6633 a vaw chhuak. Wicketkeeper nichungin catch 185 a nei a, stump 71 a nei bawk. Twenty20 match 72 captain a nihah vawi 41 hnehna chanpuiin vawi 28 an tlawm a, run 1112 a vaw chhuak. Catch a neih zat hi 40 niin vawi 22 stump a nei a, India captain zinga chak nei ngun ber a ni.

Mangṭha captain

Cricket khawvela player ropui ber ang hiala an sawi ṭhin Sachin Tendulkar chuan, "Captain ropui tak nichunga T20 leh ODI World Cup a India champion pui thei i nih avangin MSD ka lawmpui che a ni. Vawiin hi MSD thutlukna zahsak chunga a hlawhtlinna ropui tak lawmpui hun a ni a, khelmual chhungah ennawm hmuhnawm min chhawp sak chhunzawm zel ka beisei," tiin a thlah.

Australia captain hlui Michael Clarke chuan, "MS Dhoni chu India captain hlawhtling ber nichungin hotu a nihna aṭangin a chawl dawn ta. Mi ropui tak, India cricket tana thil ropui ti zel tura theihna la nei a ni," tiin twitter lamah a ziak ve bawk.

England captain hlui Mi­chael Vaughan chuan, "Cric­ket khaw­vela captain ropui ber pawl a mi meuh pawhin 'tawk' a ti ve ta. MS Dhoni hruaitu ropui tak nichunga i hnathawhnaah i thawk ṭha takzet a ni," tiin India captain aṭanga chawl tur Dhoni chu a dah sang hle.

English club lian Manchester United chuan, "MS Dhoni India captain nichunga i hlawhtlinna ropui tak avangin kan lawmpui che a, Old Trafford-ah kan inhmuh thuai kan beisei," tiin ISL club Chennaiyin FC neitu zinga mi hi an thlah ve bawk.

Dhoni aiah Kohli?

Nilaini khan MS Dhoni hian BCCI selection committee chairman MSK Prasad a titi pui a, India captain a nihna aṭanga chawlh a duh thu hi selection committee hotupa hi a hrilh. MSK Prasad chuan Dhoni nen hian a hma daiha an titi tawh thu sawiin a bak erawh engmah a sawi thui duh lo.

Media ṭhenkhat tarlan dan chuan India captain hlawhtling ber ang hiala chhal ngam Dhoni hian a duhthu rengin captain nihna hi a chawlhsan lo. BCCI chuan 2019 a World Cup lo thleng tur thlirlawkin ruahmanna a siam a, World Cup khelh hma hian ODI match 55 khelh tur an nei. Kum 2019-ah Dhoni a upat tawh dawn vangin a aiawh captain turin Virat Kohli an duh a, tun aṭanga lo inzir lawk turin ODI batsman ranking a pahnihna hi an duh.

BCCI selection committee hian an ruahmanna chu Dhoni an hrilh a, thutlukna tawp erawh Dhoni-a'n a duh dana a siam theih tur thu pawh an hrilh nghal. December 2004 a India tana a ODI match hmasa ber kheltu hian captain nih chhunzawm zel ai chuan test captain nilai Kohli tana kawngka hawn a thlang ta zawk a ni.