Murray-a'n quarterfinal a lut
Andy Murray chuan a zawnin match 26 chhung hnehna a chang ta. World number 1 Murray hian Gerald Melzer chu 7-6 (8-6), 7-5 a hnehin Qatar Open quarterfinal a lut.
Nilaini zan inkhelah Britain tlangval Murray hian beisei angin inkhel bul a ṭan ṭha bik lo. World number 68 Melzer hian set hmasa zawkah set point vawi sarih ngawt a inhumhim thei a, tie break-ah a vanduai. Austrian tlangval Melzer hian set hnihnaah pawh 5-4 a nih laiin Murray service a chhuhsak a, a him nawn - a tawpah erawh 7-5 in a chak lo zawkah a ṭang zui.
Kum 29-a upa Murray hian season hmasa tawp lam aṭang khan a mah khing zotu a hmu ta meuh lo a, tun dinhmunah tennis a khelh hun chhunga a chak zawn rei ber ṭum tawngin vawi 26 chhung zet a chak ta. Murray hian quarterfinal-ah chuan Nicolas Almagro a hmachhawn leh ang.
Grand Slam vawi thum champion tawh Murray chuan, "Melzer khan player ṭha tak a nih zia a lantir chiang hle. Kan inkhelh ṭum anga a khel chhunzawm chho zel a nih chuan kuminah hian ranking sang tak a neih hman ngei ka beisei. Qatar Open aṭanga lang chhuak chiang tak pakhat chu tunlai mipa tennis inelna hi a hautak hle tih hi a ni," tiin a sawi.
Inkhel dangah world number 2 Novak Djokovic pawhin Horacio Zeballos lakah 6-3, 6-4 in hnehna a chang ve bawk. Serbian tlangval Djokovic hian Junaury 16 aṭanga khelh ṭan tur Australian Open nomawi a kawl lai a humhim theih ngei nan Qatar Open hi ṭha taka khelh a duh thu a lo sawi tawh.
Argentine tlangval Zeballos hi tun dinhmunah world number 71 a ni mek a, a khingpui Djokovic chu hneh lo mah se an inkhelh zawh hnuah a 'selfie' pui a ni. Djokovic hian semifinal lut tur chuan Radek Stepanek a paltlang leh a ṭul dawn a ni.
Grand Slam vawi 12 champion tawh Djokovic chuan, "Tennis ka khelh hun chhungin khatiang thil kha ka vawi khat tawnna a ni. Horacio i ti ṭha lutuk, i thil tih kha a danglamin a hlu hle," tiin an thlalak dun chungchang a sawi.
Qatar Open-a hian Ivo Karlovic, Fernando Verdasco, Jo-Wilfried Tsonga leh Tomas Berdych te pawhin quarterfinal an lut ve bawk.